Angallanneq timmisartumik umiarsuarmiunngitsoq

Angallannerup aaqqissussaanissaanut naalakkersuisut nassuiaataat inatsisartuni aqagu oqaluuserineqassaaq isummerfigisassanullu ilaapput sinersortaatinut billetit tapiiffigineqassaassanersut Nuullu mittarfeqarnerata qanoq aalajangiisuutiginissaa, taamaakkaluaq angallannermut naalakkersuisoq, Jens Napaattooq, qilanaarnerarpoq.

Aamma isumaqarpoq atorsinnaasunik tunngavissaqarluni, taasami ukiuni arlalinngortuni misissuinerit arlalissuit saqqummiunneqartareerput, maannalu nuna tamaat isigalugu aaqqiinissaq kommunellu ataasiakkaat kissaataat ataasiakkaat tamaasa aallaaviginagit aaqqiinissamut tunngavissiisimalluni, Jens Napaattooq oqarpoq. Kisianni aamma aqagu oqallinnermi pinngitsoorani Nuup mittarfeqarnera qitiulluinnassaasoq Jens Napaattuup qularinngilaa. Nuup kommunalbestyrelsiata ussassaarutitigut angisuutigut isertuarnagu oqaatiginiareerpaa Nuup mittarfiata maanna piusup piaarnerpaamik 1799 meterinngortittariaqarnera, illuatungaanili Nuuk Tegnestuep pisortaata Peter Barfoedip Nuup kujatinnguani 3000 meterimik mittarfiliornissaq piukkullugu, Jens Napaattoorlu isumaqarpoq isuma taanna misissoqqittariaqartoq, misissuinerillu kingorna tamanna uterfigineqaqqittariaqarumaartoq.

Angallannermut naalakkersuisup tamatuma saniatigut siunnersuutiginiagaasa ilagaat umiarsuarnermut tapiisarnerit taamaatinneqassasut, tassa ukiumut 50 milliuuninik tapiisarneq unitsinneqassasoq, aasaannaanerusorlu imaatigut angallassineqartalissasoq, ukiorlu tamaat tamakkiisumik timmisartuussineqartalissasoq.

Aqagu inatsisartuni oqallinnerup takutikkumaarpaa Jens Napaattooq atorsinnaasumik isummersimanersoq.