Air Greenlandip timmisartuutaa Airbus Københavnimiit Kangerlussuarmut mereeraluarpoq, sinerissamiilli ilaasussat Danmarkiliarniartut Kangerlussuarmut ullup ingerlanerani apuussinnaanissaat neriuutigineqarmat utaqqigallarpai.
Københavnimut aallarnissaq nalunaqutaq 16.30-mut, tallimap qeqqanut, kinguartinneqarallarpoq. Angalaniartut tekst TV-kkut Air Greenlandillu nittartagaatigut malinnaanissaat kaammattuutigineqarpoq.
Savalimmiuni aamma avannertorsuummat qeqertat arlallit orninneqarsinaanngillat. Savalimmiuni anorersuup sekundimut 60 meteri angusarmagu, bussinik, timmisartunik umiarsuarnillu angallanneq eqqorneqarpoq.
Savalimmiut avannarpasinnerusortaani silarlussuaq sialummik malitseqaqqaariarluni ualigaa nittaallerujussuartalerpoq, taamaammat aqquserngit quatsernissaat savalimmiormiut naatsorsuutigisariaqassavaat.