Angallanneq pitsaaneruleqquaat
Siumukkut akuerseqataaffigisaannik ukiut marlussuit matuma siorna 70 mio. koruunit missaat imaatigut angallanermut tapiissutit sipaarneqarlutik peerneqarput.
Siumup ulluinnarni aqutsisuisa Naalakkersuisut ullumi saaffigaat kaammattorlugit, nunatta kitaani illoqarfinniit nunaqarfinnut imaatigut ilaasunik angallassineq ukioq mannamiit immikkut aningaasanik tapiiffigalugu pitsanngorsaavigeqqullugu.
- Maannakkut takuarput sipaarniutit taamaattut allatut aaqqiinikkut allaanerusumik naammassisinnaagaluarivut, taama oqarpoq Jonathan Motzfeldt, Siumup siulittaasuata tullia.
Saaffiginnissutit Siumuminngaanniinnaanngitsoq aammali nunarput tamakkerlugu nunaqarfinniit illoqarfinniillu takkussuuttartut tunngavigalugit Siumut partii Naalakkersuisunut taama inassuteqarpoq.
-Angallanneq pillugu ukiaru Inatsisartuni oqaluuserisaqartussaavugut. Maannakkut Naalakkersuisut nalerorpaat paasiniassallugu illoqarfinnut nunaqarfinnullu annertunerpaamik angallannerit qanoq aaqqiiviginissaat. Maannalu upernaakkut Inatsisartut ataatsimiinnerat iluatsillugu, pisariaqassappat ukiarumiit immikkut tappiiffigineqarnikkut aaqqiivigineqassanersut isummersorfiginiassagatsigu, taama nassuiaavoq Siumup siulittaasuat tullia Jonathan Motzfeldt.
