Angallanneq kipiluttunarsivoq
Angerlamut imaluunniit illoqarfimmiit illoqarfimmut sinersortaatitigut angalaniartut Arctic Umiaq Lineqarunnaarmalli nikeriarsinnaajunnaaqqapput, akikinnersiorluni sinersorusukkaanni inniminniiffissaqanngimmat.
Sisi Lea Hansen, Arsummiu Paamiunukarniaraluarpoq, tamannali ajornakusoortippaa aqqutit pissutigalugit. Ima nassuiaavoq:
- Paamiunukassaguma tallimanngornikkut umiarsuaaqqamut ilaallunga Qaqortumukaqqaassaanga tassanngaanniillu aatsaat pingasunngornikkut Narsarsuakkoorlunga timmisartumik Paamiunukarlunga, angalanerlu taanna 5.000 imaluunniit 6.000 koruunit akornanni akeqarpoq. Paamiuniit utissaguma sapaatip akunnera utaqqeqqaassaanga tallimanngornerinnakkut Arsummukartoqartarmat.
Sisi Lea Hansen oqarpoq sinersortaateqarallarmat Arsummiit toqqaannarlugu Paamiunukartarnini uterlugulu 800 koruunit missaanni akeqartarsimasut.
Oqarpoq massakkut umiarsuaaqqamut ilaalluni qaqortumukarneq siumuinnaq 500 koruunit missaanni akeqartoq. Arsuullu nalaa anorlerajuqimmat umiarsuaaqqap tamatigut tikitarnissaa nalunartartoq. Qinikkanut uparuaateqarpoq:
- Taamatut aaqqiigaangamik eqqarsaatigineq ajorneramikku illuatungaani eqqugassatik. Feriarnerpassuit eqqugaassapput. Kina feriarluni aallarusussava feriamiilarujussua angalarujussuarnermut skisuumut atussaguniuk? Tamanna assorujorujussuaq kingumut uteriartitsineruvoq.
Paamiuniit Arsummut angallassineq Pilersuisumit ukiortaamiit ingerlanneqalerpoq, Paamiuniit Arsummut umiarsuakkut toqqaannartumik aqquteqanngilaq, taamallaat Pilersuisup assartuutaa Angaju Ittuk ilaaffigalugu Qaqortukkooqqaarluni, tassanngaanniillu timmisartumik Paamiunukartoqarsinnaavoq. Kujaatani Narsamiit illoqarfimmut allamut tassa Qaqortumukarusuppugut sinersortaammut ilaalluta, tamannali ajornartoq paasivarput, tassa Narsap billetsileriffia inniminniisitsisarunnaarpoq, umiarsuarnillu qaqugu tikittoqarnissaa ilisimaneqanngilaq, siunnersuutigineqarporli umiarsuaqassappat, umiarsuaq tikippat nammineq tassunngarluni ilaasinaanerluni aperisoqarsinnaasoq.
Sinerissami illoqarfiit arlaqartut illoqarfiit akornanni sinersorniarluata billetsisiniarfigingaluaratsigit aamma iluatsinngilaq.
Umiarsuarniartunut billetsinik tuniniaaneq suli aallartinngilaq, aallartinnissaalu suli ullulerneqarani, billetsilerinermi atortorissaarutit sinerissami suli ikkussuunneqarmata. Taamaattorli, Jens Hesseldahl, Arctic Umiaq Linemi inatsisileritooq ilisimatitsivoq billetsinik tuniniaaneq Telepostimit ingerlanneqalissasoq.
