Angalatuut Ruslandimi parnaarussaapput
Angalatuujulluni ilisimasassarsiortartuullunilu oqitsuinnaaneq ajorpoq.
Angalatuut Amerikamiup tuluullu Beringip ikerasaa ikaareerlugu tamanna uppernarsivissimagaat, aviisi Anchorage Daily News allappoq.
Beringip ikerasaa Ruslandip Alaskallu akornanniippoq, angutillu pineqartut sikukkut kilometerit 90-t ulluni 15-ini pisuinnaq ikaarsimavaat. Apuukkamik Ruslandimi paarnarussaapput.
Ruslandip killeqarfiani nakkutilliisut pisuinnaq annguttut akuererusussimanngilaat. Russit inatsisaanni erseqqissumik allaqqavoq, kikkulluunniit Ruslandimut angalaniarunik isersinnaanermut akuersissummik peqqaartassasut illoqarfimmilu politiinut nalunaartoqaqqaarluni Ruslandimukartoqarsinnaasoq.
Angutit taakku aamma eqqumiitsunik atortorissaaruteqarsimapput, soorlu satellitsi aqqutigalugu oqarasuaat atorneqartartoq, GPS, aamma illuinnarsuut.
Angalatuut taakku marluk anngiortumik Ruslandimut isersimanerat unnerluussaanermik kinguneqassagunarpoq.