Angalatuup qiperugaa Danmarkimut apuuppoq

Ujaqqamik qiperugaq, Jens Erik Kjeldsen-imit qiperorneqarsimavoq. Taanna Aasianni najugaqarpoq nunarsuarmilu angallamminik angalaartarnini tusaamasaassutigalugu, Midtjyllads Avis taama allappoq.

Aviisi naapertorlugu, Jens Erik Kjeldsen ukiut marluk matuma siorna suliassinneqarsimavoq, taamani nunarsuaq kaajallallugu angallaminik "Sila"mik angalaniarluni aallalersorlu.

Jens Erik Kjeldsen-ip qiperukkani oktobarimi naammassivaa, maannalu inissaminut pivoq tamanut takutinneqarnissani utaqqiinnalerlugu.

Kjellerup-ip eqqaani eqqumiitsulianik katersisartut, Kjellerupegnens Kunstsamling, qiperukkamik suliakkiisimapput, Jens Erik Kjeldsenilu nalunngereerpaat, suliaami nunap ilaani tassani takuneqarsinnaapput. Ilaatigut utoqqaat illuata Sandgårdip eqqaaniittut ujaqqat pingasut aammalu "Jyden", Blicheregnens katersugaasiviata saavaniittoq.

Qiperugaq, nuunnera ilanngullugu akeqarsimavoq 175.000 koruuninik. Qaqugu uleerneqarnissaa suli nalunaarutigineqanngilaq.