Angalatooq Peter Brandt umiaaqqamik angalaqqilerpoq
Piitaaqqap umiaaqqamik angalaqatissani Sisimiuneersut Attumi ullumi naapissavai. Attumiillu kangerluit qanga siulitta aasivigisarsimasaat aqqutigalugit kujammut ingerlaassapput.
Atuakkani siuligut pillugit oqaluttualiaasartuni, soorlu Ole Brandtip atuakkiannit Qooqamit, tusaamassajunnarsivasi nunat aqqi makkuusut: Arfersiorfik, Tuttutooq Taseralik allallu.
Piitaaqqap angallavik Attumiit Sisimiunut siornatigut aqqutigereersimavaa, taamaattumik piffissap ilaani kalitsittarlutillu ingerlaassapput.
Piitaaqqaap Nunatsinnik kaajallaaniarnermini pilersaarutaanut ilaareerpoq kangerluit pineqartut assilisarlugillu takusassiarinissai. Tamannalu inuttaata nammineq ima tunngavilersorpaa:
- Kangerluimmi nunap inuinut itsaaniilli maannamut inuuniarnermi kulturikkullu pingaaruteqartuarsimapput. Oqaluttuarisaanitsinnilu qaangiinnagassaanatik, taama Peter Brandt tunngavilersuivoq.
Angalaneq septemberip tallimaani Sisimiuni naammassissaaq.
Peter Brandtip motoorimik angallateqarani kaajallaanialunnermini taamaallaat tunup avannaarsuani, Station Nordimiit Danneborgimut aqqut kisiat amigaatigileqqavaa.
