Knud Kristiansen: Angalasut akiliisinneqarnissartik annilaangatigissanngilaat
Angalasulli akiliisinneqarnissartik annilaangatigissanngilaat. Attaveqaqatigiinnermut naalakkersuisoq Knud Kristiansen taama oqarpoq.
- Tamanna ernumagineqassanngilaq, Namminersorlutik Oqartussanit januaarip aallaqqaataaniit iluarsineqareersimassaaq, Knud Kristiansen sapaatip akunnerata siuliani taama Qanoruumi uppernarsaavoq.
Angalaneq ataaseq marlunngortinneqassasoq
Assersuutigalugu ullumikkut Qaqortumiit Nuummukassagaanni aqqutaa tamaat Air Greenlandimut ilaasoqartarmat.
Taamaalilluni kinguaattuussagaluarunnilluunniit angalanermi ornitamut apuunneqarnissaq aqqutaa tamaat Air Greenlandip akisussaaffigisarpaa.
Disko Linelli Kujataani qulimiguulimmik angallassinissat januaarip aallaqqaataaniit ingerlatilersussaavai, tamatumalu kinguneraa siunissami angallassinerit assigiinngitsunit marlunnit ingerlanneqartalernissaat, taamaalillutillu angalasut allatut inissisimalerlutik.
Knud Kristiansenili naapertorlugu maanna iluarsiissutissamik nassaarsiortoqarpoq.
- Naalakkersuisut tamanna anguniangarinngilaat, Inatsisartullu Kiffartuussinissamik isumaqatigiissut ajorneruleqqunngilaat. Taamaattumik naalakkersuisoqarfitsinni apeqqutit assigiinngitsut qulaajarpavut innuttaasut unnuisariaqassagunik namminneq akiliissanngimmata, innuttaasut tamanna ajornartorsiutigissanngimmassuk, Knud Kristiansen oqarpoq.
Angalanissalli qulakkeerneqarnissaat qanorpiaq aningaasalersorneqassanersut erseqqissartissinnaasimanngilarput.