Angalasussat paatsiveerusimaaqisut: Jette bilitsinik sisamanik tunineqartoq

Air Greenlandip Danmarkimiit nunatsinnut angallattoqaqqusaajunnaarnerani nunatsinnukartussat bilitsissaannik isumaginninnermini attaveqariaasia angalasussanit arlalinnit isornartorsiorneqarpoq.

Paatsiveerusimaarneq amigartumillu paasissutissiineq.

Nunatsinni oqartussat januaarip ulluisa aqqaneq-aappaannut atuuttumik nunatsinnut angallasinermut decembarip ulluisa 30-anni killilersuereersullu, inuit ilimagisamit sivisunerusumik Danmarkimeereerlutik nunatsinnut tikittut ilaat taama oqarput.

Nunatsinnukarnissamulli bilitsit pillugit paatsiveqanngitsumik paasissutisseeriaaseqartoqarsimasoq, KNR-ip angalasussani apersorsimasai oqarput.

Taakkua ilagaat Jette Jeppesen. Taanna Nuummi Dronning Ingridip Napparsimmavissuani peqqissaasutut ukiut pingajussaannik atorfeqarpoq. 

Københavnimiit januaarip ulluisa arfineq-pingajuanni Nuuliartussaagaluarpoq. Angalanissaraluali taamaatimmat kingusinnerusukkut suliartortariaqarnini, angerlarsimaannaqqaartussaasariaqarnini bilitsimillu nutaamik tunineqarnissani pillugit sulisitsisuni attavigaa. Peqqinnissaqarfimmi suliffini aqqutigalugu januaarip ulluisa aqqaneq-aappaanni aallarnissaminut bilitsinnappoq.

AAMMA ATUARUK Naalakkersuisut nunatsinnukarnissat unitsikkaat

Angalanissaali januaarip ulluisa arfineq-pingajuannut siuartittoq, Air Greenlandimiit januaarip ulluisa arfineq-aappaanni allagarsivoq. Inuttaali aallannginnermini coronamut misissorteqqaartussaanini pissutigalugu ulloq taanna aallarsinnaasimanngilaq.

Air Greenlandimiilli tamatuma kingunitsianngua allagarseqqippoq, januaarillu ulluisa aqqaneq-aappaanni aallassasoq tassani allaqqavoq. Minutsillu qulit qaangiummata allagarseqqippoq - januaarip ulluisa 13-ianni aallassasoq tamatumuuna ilisimatinneqarluni.

Jette Jeppesen tamatuma kingorna assut paatsiveerusimaalerpoq. Taamaammat Air Greenlandip sullitanut kiffartuussivianut arlaleriarluni sianerpoq, iluatsinngitsumilli.

AAMMA ATUARUK Timmisartuussinernik matusinerit: Eqqugaaguit ima iliorsinnaavutit

- Sianeraangama akisoqakkajuttanngilaq. Akisoqaraangalli kiffartuussisut kiffartuussingaarsinnaasanngillat. Amerlanertigut erseqqissumik akissuteqarneq ajorput, kisianni corona pillugu allaffeqarfimmut peqqissaavimmulluunniit innersuuttarpaativut.

Sianernerit mailernerit nassuiaammik pissarsiffiunatik qatangiinnaqattaarput. Taamaammat Jette Jeppesen qaqugorpiaq aallarnissani ilisimanngikkaluarlugu, Alsimi Sønderjyllandimiittumi ilaquttani qimallugit Københavniliaannartariaqarsimavoq.

Paatsiveerusimangaatsiareerluni tamatuma kingorna timmisartorsuarmut ilaalluni marlunngornermi januaarip ulluisa aqqarnanni nunatsinnukarpoq.

Bilitsissara allanngortinneqaqattaarmat nukillalaarnaqaaq. Nunatsinnullu angallannerup killilersorneqarnera pillugu paasissutissiisarnera naammaginanngilaq, Jette Jeppesen oqarpoq. 

KNR-illu angalasussani apersorsimasaata ilai nunatsinnut uternissaminnut bilitsit pillugit amigartumik paasissutissinneqartarsimallutillu Air Greenlandip sullitanut kiffartuussivianut coronalu pillugu aqutsisoqarfimmut aamma innersuunneqaqattaarsimanerarput.

Pisarialimmik angalasoq

Jette Jeppesenip suliffini nunatsinniinninilu nuannarisupilussuuai. Coronalu nunatsinni siaruatsaaliniarlugu killilersuisoqarnera aamma isornartoqartinnagu.

Nuummulli uterluni angalanissaata paatsiveerutigineqarnerani isumaliutigaa, ilaquttani ikinngutinilu najornagit nunami allami, pingaartumik nunarsuaq tamakkerlugu tunillaassuuttoqarnerani, najugaqarlunilu sulineq imminut ilumut akilersinnaanersoq.

- Nunami allami atorfeqarlungalu najugaqaannassanerlunga soorunami isumaliutigillatsiarpa, taanna oqarpoq.

Jette Jeppesenip ikinngutini ilaquttanilu Danmarkiliartinnani ukioq ataaseq takusimanngilai.

Oqartussat nunatsinniiginnaqqusilluinnaraluartut juullisioriartorluni Danmarkiliarsimanera mianersuaalliortuliornerunersoq aperineqarami ima akivoq:

- Ilaquttat qimallugit tamaani najugaqarama taavalu ilaquttakka ikinngutikkalu ukioq ataaseq takunikuunnginnakkit Danmarkiliarnera takornariarnertut taaneqarsinnaanngilaq. Tamaani najugaqaannarusullungalu suliffinni nuannarilluakkanni atorfeqaannarusukkama taamaaliorpunga, Jette Jeppesen oqarpoq.

KNR-ip Air Greenland oqaaseqartinniaraluarmagu corona pillugu aqutsisoqarfimmut innersuunneqarpoq.

KNR-ip aqutsisoqarfimmit akissutisinissani utaqqivaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat