Angalasussat namminneq allanik aqqutissarsiorput

Nammineq aqqutissiuisunut ilaavoq Inger Eriksen Sisimiuneersoq.

Inger Eriksenip ernerata 25-inik ukiulillip, Nuummi Ilinniarfissuarmi ilinniarnermini najuutinngittoornissaa pinngitsoortinniarlugu iliuuseqapallapput.

- Air Greenlandimi angallanneq unitsinneqartoq paasigatsigu, ernerma kammalaatai Facebookikkut apersupallappavut angallammut ilaarusussinnaanersut, Inger Eriksen oqarpoq.

Massakkut januaariuvoq imarlu mallertarluni, illit anaanatut qanoq misigisimavit januaariinnarmi ernerit angallammik aallartillugu?

- Imaannaanngilaq, soorunalimi eqqarsaatigilluaqqaarparput silap qanoq innerani aallassanersoq, Inger Eriksen oqarpoq.

Johan Høegh Hansen timmisartortartutut ilinniarsimasoq, maannalu Qaasuitsup Kommuneani upalungaarsimermi pisortaq, nammineerluni iliuuseqarnermigut Air Iceland aqqutigalugu Dash 8-mik, tassa Air Greenlandip timmisartuutaasa assinganik 37-inik issimasoqarsinnaasumik attartorsimavoq. Timmisartorlu attartorneqartoq tallimanngorpat Rekjavikkimut aallassaaq, tassungalu ilaasussaapput Danmarkimi ilinniartut pingaarutilinnik misilitsittussat, allanillu pingaarutilimmik nunani allani pisassaqartut.

- Air Greenlandimi mattussinissaq qanoq sivisutigissanersoq naluarput, taamaammat nammineerluta iliuuseqarpugut, Johan Høegh Hansen oqarpoq. Taanna nammineerluni aamma Danmarkimukarsinnaajunnaarsimavoq Air Greenlandip timmisartortartunik mattussereernerata kingorna.

Johan Høegh Hansenip ilanngullugu oqaatigaa, pisariaqartitsivittoqassappat aamma Nuummiit Islandimut timmisartuussisinnaanissaq aqqutissiuussinnaallugu.

Arctic Umiaq Linemit paasitinneqarpugut Sarfaq Ittuk suliaritikkiartorluni Danmarkip tungaanut ingerlaartoq. Taamaasilluni Air Greenlandip timmisartortartunik mattussinerata nalaani Sarfaq Ittuk kiffartuussissanngilaq.