Angalaqatigiit assigiinngeqisut Nuummut qanillipput

Angalaqatigiit taakku assigiinngeqisunik siunertallit, ullaatungaa aqqaninngorluinnalersoq Utoqqarmiut Kangerluarsunnguat avaqquppaat. Sulili maannamut ilisimaneqanngilaq umiarsuit ilaat Nuuliarnersut.

Qillerut Leiv Eirikson, Nuup avatigaatsiarsuanut, David Strædemut qilleriffissaminut taaneqarsimasumut Lady Franklinimut ingerlaaraluarpoq.

Ullaatungaa aqqaneq sioqqutigaatsiaraa qillerutip, Leiv Eiriksonip ingerlaarnini allanngorteriasaarlugu nunap tungaanut ingerlaalerpoq. Sooq ingerlaarnini allanngortinneraa umiarsuit malinnaasut, Greenpeacep umiarsuaata Esperanzap aamma Kangilinnguani Sakkutooqarfiup Radioaviisimut oqaatigisinnaannginnerarpaat.

Cairn Energyp qillerutaa Esperanzamit qimattaaliorneqarluni malinneqarnera inunnit assigiinngitsumik isummersorfigineqarpoq.

Nittartakkakkut attaveqaammi Facebookimi ataasinngormalli quppernermik pilersitsisoqarnerata kingorna taasamik "Greenpeace out of Greenland"-imi, maannamut 200-nik ilaqasortaqalereersimasumi oqallittoqaqaaq.

Oqalliseqataasut ilagaat, filmiliortartoq Inuk Silis Høegh, taanna isumaqarpoq Greenpeace isumakkeerfigineqartariaqartoq Nunatta avatangiisii taakku illersorniarlugit qanoq iliuuseqarmata, Cairn Energylli siunertariinnaraa aningaasarsiorluarnissani.

Inuk Silis Høeghip taama isummersornera isumaqatigiinngissutaagaatsiarpoq. Tassunga isumaqataanngitsut ilaat Facebookimi allappoq, Greenpeace suliffissuit assigalugit Nunarput patsissiullugu aningaasanik iluanaarniarmata.

Qillerut Leiv Eirikson nunarsuatsinni qillerutini akerliuffigineqarnerpaatut Greenpeacep ippassaq oqaatigaa. Taamatullu isumaqarnerat aamma umiarsuup Esperanzap Nunatta imartaani qillerummik malinnaanera, Greenpeacep nammineq Facebookimi nittartagaani inuppassuarnit taperserneqarpoq.