Angalaniarnerni pissutsit innarluutilinnut naammaginanngitsut

Innarluutilinnut, pingaartumik kaassuartakkanik atuisunut nunatsinni angallannikkut atugassarititaasut naammaginanngilluinnarnerarlugit innarluutillit illersuisuat Naalakkersuisunut ammasunik allagaqarpoq. Qaqortumilumi annertuumik innarluutillit najugaqarfiani Ivaararmiut angalaniapiloortarsimapput.

Annertuumik innarluuteqartut angerlarsimaffianni Qaqortumiittumi najugaqartut tamangajammik kaassuartakkanik atuisuupput. Taakkualu imaatigut angalaniassagunik allatulli ikaartarfikkooqqaarlutik aallariartortarput. Tamannalu angallasseqataasartup innarluutilinnut naleqqutinngilluinnarnerarpaa.

Angallatimmi ikkivigisassat portussusaat puttasut portussusaannit allaanerusinnaasarput.

-Kørestolemiit niuteriarlugit qaqitassaagamik, ikititassaallutillu angallammut. Tamakku tamarmik oqimaatsorujussuusarput. Portusarput, ilaallu pukkippallaarlutik. Iliuusissaaleqinartaqaaq, Buuti Egede oqarpoq. 

Taanna innarluutillit illersuisuata misiginneqatigaa:

-Pitsorluppunga niuiaqqanikuugama aamma ilungersunaqaaq uannut aamma nangiarnarami. Qanorli kørestolertunut, rolatorertunut, naartusunut aamma. Nangiarnartorujussuuvoq, toqqissilluta angalasinnaasariaqaraluarpugut, Christina Johnsen oqarpoq. 

AAMMA ATUARUK 76-inik ukiulik Ketty Jakobsen Qaqortumi qimataasoq

Qaqortumi innarluutillit kaassuartakkanik atuisut kisimik angalaniaraangamik taamak atugassaqartitaasartuunngillat. Sinerissami mittarfeqarfiit, soorlu Kangerlussuarmi, majuartarfiit kaassuartakkanik atuisunut naleqqutinngilluinnarnerat takutinniarlugu innarluutillit illersuisuata ammasunik allagaqarnermini assitaliussaasa ilagaat.

-Tupinnalaartorujussuuvoq Kangerlussuaq millionerpaaluit atorlugit nutarterneqarnikuugami. Sooq tamakkua tamarmik eqqarsaatigineqarnikuunngillat? Kikkunnut tamanut atugassanngorlugit sananeqarsimannginnamik, Christina Johnsen oqarpoq. 

Kujataanut uteqqeriarutta imaatigut angallassinermi, soorlu Qaqortumi Kongebrop eqqaani, aallariartortartut tikittartullu utaqqisarfeqannginnerat uparuarneqartut ilagaat.

- Qujanartumik biiletoqaratta apuutipallassinnaalluta. Kisianni taamaanngippat silameerujussuartarsimassagaluarpugut, Buuti Egede oqarpoq. 

Kikkut tamarmik toqqissisimasariaqarput

Innarluutillillumi illersuisuata imaatigut angalaniarnermi sullinneqarnerup killeqarnera nammineq misigisimavaa.

- Kujataani angalanitsinni umiatsiamik angalavugut. Ataatsimilluunniit akunnittarfimmik utaqqisarfimmik takusaqanngilagut. Naak inuit ilaat angalasartut soorlu kørestolerlutik pitsorlullutik. Utoqqaat Sanamukartut, Rigshospitalimukartullu. angalasartut amerlaqaat, kikkut tamarmik periarfissaqartariaqaraluarput toqqissillutik angalanissaminnut, Christina Johnsen oqarpoq. 

Taamaammat Innarluutillit illersuisuata nunatsinni angallannikkut pissutsit innarluutilinnut naleqqussarneqartariaqarnerat pillugu Naalakkersuisunut ammasunik allagaqarnini iluaqutaassasoq neriuutigaa.

Naalakkersuisoq: Siunissami pitsanngorumaarpoq

Imaatigut angalaniarnermi sullinneqarnerup killeqarnera, Ineqarnermut Attaveqaqatigiinnermullu naalakkersuisup, Karl Frederik Danielsenip nassuerutigaa. 

- Kalaallit Nunaata kujataani angallasseriiaatsinik marlunnik atuilernermi angalasartorpassuarnut biilitsinik akikitsunik qulakkeerineq pissarsiassat annersaraat. Ajoraluartumik pissarsiat illuatungeqarput, tassalu umiarsualivinni amerlasuuni atortut ullutsinnut naleqqutinngimmata, naalakkersuisoq Karl Frederik Danielsen taama Christina Johnsenimut akissuteqarpoq. 

Taamaammat umiarsualivinni innarluuteqartunut naleqqutinngittut pillugit nunatta karsia qanoq aningaasalersuisinnaanersoq misissorniarpaa. 

- Angallassinermi pissutsini aningaasat sumut atorneqarpata naleqqunnerpaanersoq paasiniarlugu Naalakkersuisut ingerlaavartumik sulipput. Kingullermik minnerunngitsumillu sullissisut, angallassinermut akisussaasuusut oqaloqatigeeqqullugit kaammattuutigissavara.

Kangerlussuarmi tikitut aallalersullu majuartarfiisa sivingavallaarneri Ineqarnermut attaveqaqatigiinnermullu naalakkersuisoq, Karl Frederik Danielsenip isummerfiginngilai, kisianni:

- Mittarfiliortiternermut atatillugu allaffeqarfiga qinnuigaara saaffiginnissutit pillugu Kalaallit Airports A/S-imut ilisimatitseqqullugu. Kiisalu Kalaallit Airports A/S kaammattussavara, sukannernerulersitsinerit piumasaqaatillu nutaat, Illuliornermut Malittarisassani allassimalersussat isiginiaqqullugit.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat