Sulinngiffeqarluni angalanermut sillimmasiinissaq Peqqinnissaqarfiup inassutigaa. Tassamiaasiit ukioq taamaalivoq, sulinngiffeqarnissaq nuannertaqisoq qanillivoraasiit, ilarpassuavullu nunanut allanut angalasussaassapput. Pikileraanni napparsimanissaq eqqarsaatini salliusan¬ngikkaluartoq nalaatsortitsissagaluaraanni napparsimasutut ikiorneqarnissamut pisinnaatitaaffiit suunersut angalatinnani misissussallugu pingaartuuvoq, Namminersornerullutik Oqartussat nittartakkaminni www.nanoq.gl-imi allapput.
Angalassagaangavit - aamma Danmarkiliassaguit - tamatigut angalanermut sillimmasertarnissat Peqqinnissaqarfiup inassutigaa. Taamak sillimmasersimagaanni nappariataarnermut, katsorsartinnermut, napparsimmavimmi uninnganermut nakorsaatinullu, kiisalu angerlaanneqarnermut atasumik aningaasartuutit tamarmik akilerneqartarput. Angalanermut sillimmasiinikkut pisortanit namminersortunillu napparsimasutut ikiorneqarneq sunaluunniit isumagineqartarpoq. Assersuutigiinnarlugu akiutiniitillutit angerlaanneqassaguit tamanna akisoorujussuusinnaavoq.
Angalanissamut sillimmasiinngikkuit sumi najugaqarnermut uppernarsaatit eqqaamassavat, taanna atorlugu Danmarkimi, Savalimmiuni nunanilu avannarlerni allani napparsimanermi ikiorneqarsinnaagavit. Europaliassaguit eqqaamassavat uppernarsaammik Europamiut napparsimalersinnaanermut sillimmasigaanermut allagartaannut taartaagallartumik pissarsiniassagavit. Uppernarsaatitut allagartat assigiinngitsut marluk taakku tamarmik Kommunemi pissarsiarineqarsinnaapput.
-Sumi najugaqarnermut uppernarsaat imaluunniit uppernarsaatitut allagartaq Europamiut napparsimalersinnaanermut sillimmasigaanermut allagartaannut taartaagallartoq piginngikkukkit napparsimaninni ikiorneqarninnut sumulluunniit akiliisinneqartussaavutit, tassalu aningaasartuutit tamakku angerlareeruit taarsertissinnaanagit, Peqqinnissaqarfik nittartakkami allappoq.
Peqqissutsimut tunngasumik nittartakkami www.peqqik.gl nunani allani angalatilluni napparsimaleraanni ikiorneqartarnermut maleruagassat pillugit paasissutissanik nassaassaqarpoq. Aamma nunani allani angalatillutit suut immikkut alaatsinaassagitit atuarsinnaavat. Taava soorlu Kretamut angalatillutit naakkut nualluleriasaassagaluaruit, imaluunniit Møens Klint’imi pisuttuartillutit niuiariataassagaluaruit qanoq iliussanerlutit nalussanngilat.
