Angalanermi inatsit allanngorpoq
Kikkut sermersuakkoortassanersut Tunullu avannaanni nunami eqqissisimatitasukkut angalasassanersut Namminersornerullutik Oqartussat siunissami aalajangertassagaat naalagaaffeqatigiinneq pillugu ataatsimiittoqarmat aalajangeqarpoq, Namminersornerullutik Oqartussani pisortaaneq Kaj Kleist taama nalunaarpoq, qaquguli aalajangiisoqartalernissaa oqaatigisinnaannginnerarpaa.
Dansk Polar Centerip pineqartuni angalaniartut massakkut allattorlugillu akuerisarpai.
Sermersuarmik itiviiniartut Tunullu avannaanut angalaniartut ukiuni kingullerni tallimani amerliartuinnarput ukioq manna 130-t 140-llu akornanni nunatsinni paasisassarsiorniarlutik qinnuteqarsimasut Dansk Polar Centerimi atorfilik Poul Erik Sørensen nalunaarpoq ilanngullugulu eqqaavaa Namminersornerullik Oqartussani atorfillit nunatsinni angalaniarlutik qinnuteqarsimasut pillugit tusarniaaffigeqqaarlugit akuersissummik tunniussisoqartartoq.
Nunatsinni paasissarsiorniarluni angalaniaraanni sisamanik piumasaqartoqarpoq; angalaniartut ikinnerpaamik marluussapput, angalanerup nalaani annaassiniartoqassagaluarpat annaassiniarnerup aningaasartuutaanissaanut qulakkeerinnittoqariissaaq, ajunaalernermi kalerrisaarut oqartussanit akuerineqartoq nassarneqassaaq taassuminngalu atuisinnaanermut akuersissummik angalaniartut peqassapput kiisalu apriilip aallaqqaataaniit oktobarip qiteqqunneranut taamaallaat angalasoqarsinnaavoq.
