Angalanermi bonusinik katersisarneq Kaj Kleistip misissuiviginiarpaa
Naalakkersuisuni ilaasortat atorfilittallu inuiaqatigiinnik sullissinerminni angalasarnitik aqqutigalugit bonusinik namminneq atugassaminnik katersisarput. Tamannali uagut pisuussutiginngilarput – SAS-iuna pisuusoq, tassanngaanniit inunnit tamanit atorneqarnissaat ajornakusoortinneqarami, Namminersornerullutik Oqartussani pisortaaneq naammagittaalliorpoq, misissuipallakkusupporli.
Bonusit taakkua naleqartorujussuupput, soorlu assersuutigalugu akeqanngitsumik Europami angalaartoqarsinnaavoq.
-Hotelimimi najugaqarniaruma?
- Pointit taakku atorlugit tamarmik akilerneqarsinnaapput. Sivisoorsuarmik sulinngiffeqarsinnaavutit suna tamaat akilertereerlugu.
SAS-imi tuniniaanermi pisortaq Jens Aaløse ullumi ullup qeqqanut Radioaviisimi Jens Napaattuup ukioq kingulleq angalanermi bonusinnattaavi 80.000-t pillugit taama oqarpoq. Napaattoorli kisimiinngilaq – apersuinitsinni paasivarput naalakkersuisuni ilaasortat tamangajammik Eurobonusimi ilaasortaasut.
Akileraartartut akiligaannik angalalluni bonusisiat Namminersornerullutik Oqartussanit atorneqartannginnerannut SAS pisuuvoq. Kaj Kleist aamma Eurobonusimi ilaasortaasoq taamatut oqarpoq.
- SAS pisortatigoortumik saaffigisarsimagaluarparput, kisiannili ajornakusoorsimavoq, taannalu tassa tunngavigalugu ukiut sisamat tallimat qaangiupput sulisut ajunngitsorsiassaattut isigiinnarniarlutigu aalajangeratsigu. Sulisugut amerlanerit sulinngiffeqarlutik maanna angalammata aggustusimi pisinnaanissaa qularnanngitsumik naalakkersuisunut qaqeqqinneqassasoq, Kaj Kleist oqarpoq.
Kaj Kleist aamma oqarpoq, periarfissat maannakkut atuuttut atorneqarsinnaasut, imaluunniit allanngortillugu sulisunut taakkununnga ajunngitsorsiassatut isigineqartut utertinneqassanersut taamaasillutillu angalanermut atatillugu atorneqarsinnaanersut tassani aalajangiiffigisassatut ilanngunneqarsinnaanissaat eqqarsaatiginerarpaa.
Naggataatigullu oqarpoq, 50-60 millionit missaanni Namminersornerullutik Oqartussaniit angalanermi atorneqartarunartut.
