Angalaarlutik aasarsioriassamaat

Karl Elias Olsen Qooqqunut panni illuaqqiortoq assartuussuppaa. Maannamut sapaatip akunneri marluk angallamik sanasussat assartuuttarpai. Taanna aallaasilisaarluni aallariartortoq naammattoorparput, aqqutaanimi puiseqartarmat.

- Nuanneqaaq, kiak toornaarsuaqqanillu (red.ippernat) ulikkaarluni, tassa aasap alianaaqutai, Karl Elias Olsen oqarpoq.

Karl Elias Olsen Orsiivimmit aallartorlu Amerikamiut New Yorkimit angallat tissiaatilik Fiona naammattoorparput. Inuttat ilaat Joey Waits Kalaallit Nunaat tikillugu kianaarpaa assullu ippeqilluni.

- kiaqaaq, ilimaginngikkaluarakku Kalaallit Nunaat taama kiatsigissasoq, Joey Waits oqarpoq. Taanna ilanilu New Yorkimiit Nuummut tikippoq Upernaviullu tungaanut tissiataariarlutik akilinermut ikaassapput. Joeyip naatsorsuutigivaa Alaskamut ingerlaqqissallutik.

Amerikamiut aallartullu Flemming Heinrich Pinngortitaleriffiup angallataani Aage V. Jensen II-mi inuttaasoq naapippparput.

- Biologit Nuup Kangerluarsunnguani CO2-mik misissuisut assartuuttarpakka, ataasinngornermiit tallimanngornermut, ilaatigullu sapaatip akunneri naaneri ilannguttarlugit, Flemming Heinrich oqarpoq. Nuuk Basisimi ilisimatusartut illuarassaat sananeqaleruttorput, sanasullu Flemming Heinrichip assartuuppai.