Angajoqqat innarluutilinnik meerallit ikiortissaminnik amigaateqarput

Nunarsuaq tamakkerlugu innarluutillit ulluat ullumi malunnartinneqarpoq.Innarluutillit ulloqartinneqartarnerat ajunngitsuuvoq innarluutillit atugaannik saqqummiussinermut atorneqartarmat taama isumaqarpoq innarluutilimmut ataataasoq Nis Andersen.
Assi © : Kommuneqarfik Sermersooq
decembarip 03-at 2015 14:19

Ilaqutariit Andersenikkut arfineq pingasunik ukiulimmik innarluuteqartumik paneqarput, taanna oqalussinnaanngilaq aamma nerisinneqartariaqarpoq, taamaattumik ulloq unnuarlu isumagineqartariaqarluni.  

Innarluutilimmik meeraqarneq angajoqqaajusunut tamakkersornarpoq.

Nis Andersenikkut paniat kinguarsimasuuvoq, oqalussinnaanngilaq ussersorneq atorlugu attavigineqartarpoq   naammattumik nerisinnaanngimmat  nerisai sullulik sonde atorlugu sisamariarluni  nerisinneqartarpoq

Aamma atuaruk Ullumikkut ulloq innarluutillit nunarsuaq tamakkerlugu ulloraat

Nis Andersenikkut paniat ullukkut innarluuteqartut ornittagaannut Orniffimmiittarpoq ualikkut angerlaraangat ilaqutariit tamakkiisumik panitsik isumagisariaqartarpaat.

- Panipput sinilernissaata tungaanut nakkutigiinnavittarparput, pinerilli tamaasa isumagineqartarnera artornartuaannartuunngilaq  taamaakkaluartoq ullut tamaasa paarsilluni tamakkersornartarpoq,  Nis Andersen oqarpoq.

Aamma atuaruk Sermersuup innarluutillit inuusuttut sammisassaat pitsanngorsarpai

Ilaqutariinnik angerlarsimaffiup avataani oqilisaasartussanik pissarsiniarneq ilaqutariit Andersenikkut  sivisuumik kommunemut sorsuutigereerlugu iluatsippaat. 

- Pisariaqartittarparput panitta angerlarsimaffiup avataani paarineqartarnissaa,  tamannalu sivisuumik kommunemut sorsuutigereerlugu iluatsippoq, maannakkut panipput ilaqutariinni ullut 14-ikkaarlugit paarineqartarpoq, Nis Andersen oqarpoq.

Aamma atuaruk Meeqqat innarluutillit immikkut ikiorserneqarput

Innarluutilinnut tapersersortinik ilinniarsimasunik qallunaatut støtteperson-inik nunatsinni amigaateqartoqartoq, angajoqqaat innarluutilinnik meeraqartut arlaqartut tamanna saqqummiuttaraat Nis Andersen oqarpoq.

- Pisariaqartinnerpaasarput tassaavoq  ilaqutariinnik oqilisaasartussanik peqarnissaq taakkualu saniatigut tapersersortinik  aalajaatsunik ilinniarsimasunik  imaluunniit pikkorissarsimasunik aammalu kommunemi sullississut innarluuteqartut pillugit ilinniarsimasuunissaat pikorissuunissaallu kissatigineqarpoq, Nis Andersen oqarpoq,

- Sinerissami angajoqqaanik innarluutilinnik meeraqartunik oqaloqatigisartakkatsinnit tusarparput tapersersortinik aamma ilaqutariinnik oqilisaasartunik amigaateqarneq, Nis Andersen oqarpoq.  

Aamma atuaruk Kalaallit Nunaanni innarluutilinnut nalunaarusiaq nutaaq

Nunarsuaq tamakkerlugu innarluutillit ulloqartinneqartarnerat ajunngitsuusoq Nis Andersen isumaqarpoq.

-  Innarluutillit ulloqartinneqartarnerat ajunngitsukuluusutut isumaqarfigivara imaallaat ulloq taanna atorneqarsinnaasarpoq innarluutillit ajornartorsiutaannik saqqummiinissamut, Nis Andersen oqarpoq.