Angajoqqaat peqatigiiffilioqqullugit kaammattorneqarput
Soorlu Danmarkimi peqatigiiffeqartoq taaguutilimmik "Skole og Samfund", aamma maani Nunatsinni "Angajoqqaanik nakkutiginnittunik" peqatigiiffiliortoqartariaqaraluarpoq, taakkua meeqqat atuarfiannut inatsisip atuutsinneqarnera ilaatigut nakkutigisinnaavaat. Taama isumaqarpoq ilinniartitsisut kattuffiata IMAK-ip siulittaasua Sivso Dorph.
Taanna isumaqarpoq, angajoqqaat peqatigiiffiliornermikkut, angajoqqaat atuarfimmi soqutigisatik ersarinnerulersissagaat.
Danmarkimi peqatigiiffik "Skole og Samfund" atuarfiit siulersuisuisa peqatigiiffigaat. Peqatigiiffik nuna tamakkerlugu illoqarfinnilu ataasiakkaani sulivoq, Danmarkimilu atuarfimmut attuumassutillit allat soqutiginnittut aamma ilaasortaralugit.
Peqatigiiffiup "Skole og Samfund"-ip angajoqqaat soqutigisaat ilaatigut politikerinut atuarfiullu suleqatigisaannut assigiinngitsunut ingerlateqqittarpai.
- Peqatigiiffimmik taamaattumik Nunatsinni amigaateqarpugut, Sivso Dorph naggasiivoq.
