Ataatsimeersuartut: Angajoqqaat nunaqarfimmiut meeqqatik ilinniarnissaannut ikorfartorlisigit
Nunaqarfiit ilinniartitsisunik ilinniarsimasunik amigaateqartarput, meeqqallu suli ukiukitsillutik illoqarfinnut meeqqat atuarfiat naammassiniarlugu aallartariaqartarput.
Nunaqarfinnippasuarni ilinniagaqarsinnaaneq killeqarpoq, inuusuttullu siunissami ilinniagaqaratik suliffissaaleqisunngussanngippata, angajoqqaat allanit iliuuseqarnerusariaqarput.
Nunatsinni Inoqarfiit minnerit pillugit Nuummi marlunngornermi pingasunngornermilu ataatsimeersuarneranni NUIKI-meersup Palle Lennertip oqariartuutigisaasa ilai taamaapput.
NUIKI-p nunaqarfinni inuusuttuaqqat nukissallit ilinniagaqaqqinnissaannut naggataatigullu suliffeqalerniassammata piukkunnarsartarpai.
Suliniutillu ingerlanneqarnera maannamut angusarissaarfiuvoq, inuusuttummi NUIKI-mi peqataasimasut 80 procentii inuussutissarsiornermut ilinniagaqarnissaminnut ilinniarnertuunngorniarlernisamulluunniit piginnaasaqarlutik uppnarsaateqalertarput.
Angajoqqaat sinaakkusiisuusut
Palle Lennertip oqarneratut angajoqqaat tassaapput meeqqaminnut sinaakkusiissussat.
- Ilinniartitaanerup aaqqissuussaanera immikkuullarissuuvoq - ilinniartitavut ingerlariaqqittartut tassaapput angerlarsimaffimminni atugarissaartut. Angajoqqaat inuusuttortaminnut malinnaappata inuusuttullu ilinnialernissamut piareersarpatigit, inuusuttut ilinniagaqarnerat iluatsilluartarpoq, Palle Lennert oqarpoq.
Taamannallu paasinninneq pingaartuusoq, Palle Lennert isumaqarpoq, NUIKI-llu inuusuttunik ataasiakkaanik atuartitsinermini tamanna ilannguttarpaa.
- Nunatsinni angajoqqaarpassuaqarpoq ilinniagaqanngitsunik, angajoqqaallu meeqqamik ilinniarneranni ikiuunnissaat pisariaqarpoq. Angajoqqaarpassuit meeqqamik ilinniarnerani qanoq ikorfartorsinnaanerlugu nalornissutigisarmassuk, ataatsimoorluta pitsanngortitsiniaasimavugut, Palle Lennert oqarpoq.
Meeqqat akisussaaffimmik tigusissasut
Meeqqat imminnut akisussaaffigilertarnerat, NUIKI-p iluatsitsineranut pisutaalluinnartunut ilaavoq. Pingaarnerpaamik namminneerlutik ilinniarusussuseqartariaqarput. Taavalu piareersarsimallutik piffissaq eqqorlugu takkuttassapput:
- Maannamiit piareersalereeqqusarpavut; naak aatsaat maajiungaluartoq aggustimilu aatsaat atualertussaagaluarlusi, maannangaaq piareersalereeritsi, taava aggustimi piareeqqassaasi.
Palle Lennertip oqarnera naapertorlugu, nunaqarfinneersut ilinniagaqalernissamut unammilligasaqarnerusarput, ajornanngilarli.
- Uagut nunaqarfimmiit illoqarfimut ilinniagaqariartornissamut piareersimasunngornissaat sulassaraarput. Nunaqarfimmiut nammineersinnaanngorsartussaapput.
NUIKI Villum-fondenimiit aningaasalersorneqarluni ukiut sisamat siulliit ingerlavoq, 2017-imiilli Namminersorlutik Oqartussaniit aningaasalersorneqarluni.
Namminersorlutik Oqartussat naapertorlugit inuusuttut nunaqarfimmiut ilinniagaqaratik aalajangersimasumik suliffeqanngitsut 1000-it 15000-llu akornanniipput.
Namminersorlutik oqartussat nalunaarsugaat naapertorlugit 1000-1500 ilinniagaqanngitsut aalajangersimasumik suliffeqanngillat.
AAMMA ATUARUK Eqqagassalerineq ataatsimeersuarnermi sammineqartoq
AAMMA ATUARUK Nunaqarfiit ilaat ineriartortinneqarsinnaapput