Angajoqqaat meeqqatik nakkutilluarnerusariaqarpaat

- Meeqqatit unnukkut sumi aneertarnersut nalunngiliuk? Meeqqat sumunngarnertik oqaatigisarpaat? Piffissap qanoq ilinerani meeqqatit angerlartarpat ? Apeqqutit tamakku Aasianni angajoqqaajusut ualeq manna aallarnerfigalugu akisinnaanngussavaat. Aasianni pitsaaliuinermik ataatsimiititaliami piviusunngortitsisartut Pisiffiup silataani immersugassanik maanna agguaassileruttorput, suliniullu taanna Aasianni aserorterisarnerujussuit annikillisarneqarnissaannik siunertaqarpoq.
Allattoq Mads Lynge
aggustip 17-at 2012 05:59

- Aasiannimi aserorterisarnerit sualuppallaaqaat. Pissutsimmi tamakku pitsaaliorneqarnerinut atatillugu meeqqat inuusuttuaqqallu juunimi paasisitsitsiniaaffigaavut, maannalu angajoqqaat tullinnguupput, Aasianni pitsaaliuinermut siunnersorti Margrethe O. Jensen taama oqarpoq.

Tassa meeqqat sumiittarneri pillugit angajoqqaajusut malinnaalluarnerulernissaat taamatut suliniuteqarnerup siunertarivaa, tamannaannaanngilarli. Tassami angajoqqaat meerartaminnik killilersuisinnaanermik nalorsarlutik ikiortissaalatsisut pitsaaliuinermik suliaqartut pissarsiariniarsaraat ikiorserumallugillu.

- Ilaatigummi angajoqqaat ajornartorsiutitik pillugit oqaloqatissaaleqisarnersut apeqqutigisarparput, tassalu perorsaanermut tunngasunik arlaatigut nalornisuussagaluarpata siunnersorsinnaaniassagatsigit, Margrethe O. Jensen oqarpoq.

- Aasianni aserorterisarnerujussuup akiorniarneqarnera tamatta suleqatigiissutigisariaqarparput, tassalu iliuutsit nutaat maanna atulerlutigit, pitsaaliuinermik siunnersuisoq taama oqarpoq.

Angajoqqaa Aasianni Pisiffiup silataani immersugassanik akisisimasut akornanni makitsisoqassaaq unnialumigooq eqqugassat alutornarluartuusut.