Angajoqqaat meeqqami internettikkut sulerisarnerannik ilisimasaqannginnerat ernumanartoq

Internettimi meeqqanut, inuusuttunut inersimasunullu periarfissarpassuaqarpoq. Navianartunillu qamasoqarpoq, angajoqqaallu meeqqani internettimi sulerisarneranik ilisimasaqarnissaat pingaaruteqarpoq.

Nittartakkatigut attaveqaqatigiittarfiit soorlu Facebook Snapchatilu inersimasut allatut kinaassusilerlutik meeqqanut inuusuttunullu attaveqarlutik kannguttaattuliorfigisinnaavaat.

Kannguttaatsuliorneq ajornerpaami atornerluinermik kinguneqarsinnaavoq, ilaannilu meeqqat inersimasunit assinik videolianillu kinguaassiutinut tunngasunit nassiusseqquneqarsinnaapput taakkulu akuersillutik.

Bjørn Tegner Bay isumaqarpoq internettip politiit angajoqqaallu nutaanik ernumassutissaqartilerlugillu suliassaqartilerai.

- Internetti aqqutigalugu kannguttaatsuliornerit kinguaassiutinullu atornerluinerit allat ernumaginerpaavakka, Bjørn Tegner Bay oqarpoq.

AAMMA ATUARUK Nakuusertoqartarnerujussua ajornartorsiutaavoq

Tamatumali navianarnera angajoqqaat paasisimanngilaat.

- Angajoqqaat ilaasa akornanni meeqqami internettikkut sulerinerannut qanoq alaatsinaatsigisoqannginnera ernumassutigisarpara, politiit qullersaat oqarpoq.

Meeqqat nakkutigineqaannavinnissaanut kaammattuinngilaq. Meeqqalli erseqqissumik oqaloqatiginissaat pingaarnerarpaa.

- Internettimi susoqarsinnaava suut sianigisariaqarpat.

Politiit qullersaat naapertorlugu nunatsinni politiit internetti aqqutigalugu kannguttaatsuliornerit unammillernissaat Naalagaaffiup politiivisa suleqatiginerat iluaqutigalugu piareersimaffigaat.

- Ataatsimut isigalugu Danmarkimi suleqatigut tassunga immikkut ilisimasaqartut suleqatigaagut, politiit qullersaat oqarpoq.