Angajoqqaat illuatungiliuttorlu: Sipaarniuteqarneq Attup meeqqeriviani meeqqat nerisaqarnerinut eqquisoq

Kommune Qeqertalimmi meeqqerivik Attumiittoq, Meeqqerivik Alliaq, sipaarniarfigineqarpoq. Angajoqqaat sapaatip -akunnerata siuliani pingasunngornermi ataatsimiisinneqarnerini tamanna nalunaarutigineqarpoq, ullorlu taanna atuutsinneqalersoq, angajoqqaat ilaasa oqaatigaat. Illuatungiliuttuusup kommunalbestyrelsimut ilaasortap, Aqqa Samuelsenip, tamanna isornartorsiorpaa.

Meeqqerivimmiittuutilik Johanne Inûsugtok angajoqqaat sinnissaannut ilaasortaavoq, taassumalu oqarnera naapertorlugu meeqqat meeqqerivimmiittut ullaap tungaani qulip qeqqanut ualikkullu pingasup qeqqanut nerisinneqartarunnaarput.

Angajoqqaajulluni tamanna kusanaatsoq akuersaarneqarsinnaanngitsorlu, Johanne Inûsugtok oqarpoq.

- Angajoqqaat ataatsimiikkatta sulisuninngaanniit paasitinneqarpugut qulip qeqqa pingasullu qeqqa tamussiussassat peerneqartut. Taava imaappoq meeraq ullaakkut nerereersimalluni takkuttussaq aqqarngup tungaanut nerisaqanngiivissasoq, taanna oqarpoq nangillunilu:

- Uannut nuanninngilaq, taamaaliortoqarnera kusanaatsorujussuuvoq meeqqat oqarsinnaanngitsut sipaarniarfigineqarmata.

Meeqqanut nerisitsisarunnaarneq sunniuteqalereersoq

Taamatullu meeqqat sipaarniarfigineqarnerat angajoqqaaniit meeqqanut sunniuteqalereersoq, anaanaasup maluginiarpaa.

- Meeqqerivimmut ippassaq aqqusaarama meeqqat ilaat qiasut maluginiarpakka, sammisassaqartitsinermullu peqataaniaraluarlutik malinnaasinnaanngillat, nipituumimmi qissakkamik, anaanaasoq oqaluttuarpoq.

Kommune Qeqertalimmi kommunalbestyrelsimut ilaasortap tusagassiuutinut nalunaarummini tamanna isornartorsiungaatsiarpaa.

Siumut sinnerlugu Kommune Qeqertalimmi kommunalbestyrelsimut ilaasortaq, Aqqa Samuelsen, ilaatigut ima isornartorsiuivoq:

- Meeqqat mikisut ullup ingerlanerani nerisassaqartinneqartariaqarput, aamma akulikitsunik nerisassaqanngikkunik nukissaqanngillat, ilinniarsinnaanngillat timersorsinnaanngillat aammalu ataatsimuussutsimut iluamik peqataasinnaannatik, taanna oqarpoq.

Isornartorsiummut tassunga tunngatillugu Kommune Qeqertalimmi borgmesteri Simigaq Heilmann KNR-imut oqarpoq, meeqqat sipaarniarfigineqanngitsut. Taassumali kommunalpolitikkerit isornartorsiuinnginnerminni kommunip allaffianut saaffiginnillaqqullugit kaammattuivoq:

- Meeqqat sipaarniarfigineqarnissaat politikikkut aalajangerneqarnikuunngilaq, attaveqatigiinneq pitsaasimanngippat akisussaaffik taanna uanga tigusinnaavara aaqqinneqarnissaalu qulakkeerlugu.

- Innuttaasut paasisinnaavakka toqqissisimanngilluinnarpata isumaqarpatalu sipaarniarneq pissutigalugu allaat meeqqat massakkut taamatut eqqorneqartut. Nerisarfiit marluk peerneqarnerat eqqunngilaq, taamaattoqanngilaq.

Attumi meeqqerivimmi ningiu oqaaseqartinniarlugu KNR-imiit suli iluatsinngilarput.