Angajoqqaat coronamik Uummannami uppernarsaasoqareermat angerlarsimatitsiinnarput – Aaqa taakku ilagaat

Angerlarsimatiinnarneranut imminut taakununngalu illersuiniarneruvoq, Aaqa Jensen oqarpoq.

Coronamik tunillatsissimasumik Uummannami sapaatip-akunnerata siuliani sisamanngornermi siullermeertumik uppernarsaasoqarpoq.

Tunillatsissimasoq peqqinnissaqarfimmi sulisuuvoq, uppernarsaasoqareersorlu inuit qulit missaaniittut angerlarsimaannartussanngortinneqarput.

Angajoqqaat coronamik tunillatsissimasumik Uummannami siullermeertumik uppernarsaasoqarnerata nalunaarutigineqarnera pissutigalugu meeqqaminnik atuariartortitsinngillat: Meeqqanit atuartunit 198-init 57-iinnaat – tassa sisamararterutaat missaat tallimanngornermi atuariartunngillat.

AAMMA ATUARUK Kun 57 elever kom i skole efter coronasmitte i Uummannaq

- Immaqa nalinginnaasorujussuuvoq, pissutigalugu pissutsit qularutigimmatigit. Uummannamimi tunillatsissimasumi aatsaat siullermeertumik uppernarsaasoqarpoq, Atuarfik Edvard Krusemi pisortaq, Tim Arnoldi KNR-imut ippassaq oqarpoq.

Atuartut amerlasuut sapaatip-akunnerani matumani suli angerlarsimaannarput: Atuartut 60-init 70-inut amigaataapput.

Aaqa Jensen angajoqqaat meeqqaminnik atuariartortitsinngitsut ilagaat. Taanna arfineq-marlunnik ukiulimmik erneqarpoq, taannalu ataasinngorpat aatsaat atuariartortinniarpaa. Aamma ernerata aappaa sisamanik ukiulik angerlarsimaannarpoq.

Taakku tallimanngormalli angerlarsimalerput.

- Meeqqakka eqimattani aarlerinartorsiortuunngillat, uangali anersaartorniarnikkut ajornartorsiuteqartarpunga. Taammammat imminut meeqqannullu illersuiniarlunga angerlarsimatitsivunga, Aaqa Jensen KNR-imut oqarpoq.

- Tunillatsissimasup allanut tunillaasimannginnerata ersersinneqarnissaata tungaanut  meeqqerivimmit atuarfimmiillu angerlarsimatinniarlugit aalajangernikuuarput.

Illoqarfimmi tunillatsissimasoqanngitsoq

Uummannami tunillatsissimasunik allanik uppernarsaasoqanngitsoq, nakorsaanerup, Henrik L. Hansenip sapaatiummat oqaatigaa. Taamaammat illoqarfimmi tunillatsissimasoqarneranut takussutissaqanngitsutut nalilerpaa.

Tamanna ippassaq uteqqippaa Uummannamilu angajoqqaat meeqqaminnik atuariartortitseqqinnissaannik kaammattuuteqarfigalugit.

Taamaakkaluartorli Aaqa Jensenip meeqqani angerlarsimatiinnarpai.

AAMMA ATUARUK Nakorsaaneq eqqissisaavoq: Uummannami atuartut atuariartukutsoorsinnaapput

- Siullermik paasilluni toqqissisimanarpoq. Kisianni taamaakkaluartoq tunillatsisimagaluarlutik tunillatsissimanngitsutut uppernaasoqarsimasinnaavoq, taakkulu ullualuit qaangiuppata tunillatsissimasut aatsaat paasineqarsinnaallutik.

- Meeqqat angerlarsimaannarnissamut pissutsimik nassuiaappakka. Paasinnipput akuersillutillu. Illoqarfiup avataatungaani najugaqarpugut, inuillu allat naapinnagit pisuttualaartarluta.

Nunatsinni tunillatsissimasoqanngitsoq

Peqqinnissaqarfimmi sulisoq Uumannamiikkunnaareerpoq. Taanna Uummannamut angalasimavoq, tikinnerminiillu ullut arfineq-marluk qaangiunneranni misissortilluni – tassanilu tunillatsissimasoq paasineqarpoq.

Peqqinnissaqarfimmi sulisoq maanna peqqisseqqissimavoq, nunatsinnilu coronamik maannakkut tunillatsissimasoqarani.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat