Angajoqqaat atuarfimmilu sulialik uparuaapput
Meeqqat 14-iniit 16-inut ukiullit 1.000 kr.-inik ukiumut naalakkersuisunit aningaasarsissagunik inuiaqatigiinnut iluaqutaasumik nalunaaquttap akunnerini 80-ini sulissapput, Inatsisartuni ilaasortaq Asii Chemnitz Narup siunnersuivoq. Sinerissami angajoqqaat atuarfimmilu suliallit isumaat assigiinngillat.
Uummannami atuartuutilik Gertrud Møller, Asii Chemnitz Narup-ip siunnersuutaa pillaatissiatut atorneqassanngitsoq isumaqarpoq.
- Inuusuttuaqqat 1000 kr-it aningaasat Namminersornerullutik Oqartussaniit pisartagaat inatsisartuni akuerineqareersut, meeqqat pillaatisiaattut pissanngilaat. Uanga misigisimavunga Asii Chemnitz Narup-ip siunnersuutaa akuerineqassappat angajoqqaatut akisussaaffiga arsaarneqassasoq. Uagut meeqqavut nammineq perorsartussaavagut inuiaqatigiit perorsartussaanngilaat, taama oqarpoq Gertrud Møller.
Maniitsumi Atuarfik Kilaaseeqqami pisortaq Elna Heilmann isumaqarpoq, siunnersuut pipallataavallaartoq.
-Sorpassuit inatsisisit allallu kalluarneqaqqaartariaqassapput, taamatut pisoqassappat, taavalu iluamik eqqartorluaqqaarlugit inuiaqatigiinni taanna pilersinneqassaguni pilersinneqassaaq, Maaniitsumi Atuarfimmi Kilaaseeqqami pisortaq Elna Heilmann oqarpoq.
Atuarfinni pisortat sulisullu suliassaqareeqaat.
- Tassami, soorlu oqartunga kalluarneqartussat amerlasoorujussuugamik taamaammat imaaliallaannaq pilersinneqarsinnaanngilaq sorpassuupput eqqartorneqaqqaartussat.
Elna Heilmann aamma oqarpoq, atuartut 14-t 16-llu akornanni ukiullit arlallit sunngiffimminni suliffeqareertartut aamma eqqarsaatigisariaqartut.
Narsami atuartuutillip atuarfiullu siulersuisuini ilaasortap Salik Hardip, Asii Chemnitz Narupip Inatsisartuni aalajangiiffigisassatut siunnersuutaa isumaqatiginartikkaluarlugu, kisianneqartippaa.
- Siunnersuut ajunngikkaluarpoq, aamma isumaqatiginartoqartissinnaavara. Pingaartuusorivarali meeqqat paasitinneqassasut sooq aningaasanik Namminersornerullutik Oqartussaniit tunineqarnerlutik. Neriuutigigaluarpara aningaasat sunut atorneqarsinnaanerat meeqqanut paasisitsiniaasoqassasoq. Kisianni paasisinnaangilara sooq meeqqat suleqqaarlutik aningaasat taakku pisinnaaneraat.
Salik Hard Narsami atuartuutilik oqarpoq. KANUKOKA-mit oqaaseqartitsiniaraluaratta iluatsitsinngilagut.
