Angajoqqaat akisussaanerat kommunit misissorniarpaat
Meeqqanik kaatsitsisoqartarnera tassatuaanngilaq pissaaleqisut ajornartorsiutaat, aammali ilaqutariinni akissaqarnerusuni atuuppoq.Kommunit isumaginninnermut atuarfeqarnermilu ataatsimiititaliaasa siulittaasuisa ingerlatsivinnilu pisortaatitaasa ilaqutariit meerartallit ikiorserneqartarnerat pillugu sapaatip akunnerani kingullermi isumasioqatigiinneranni siunissaq qaninnerusoq ungasinnerusorlu eqqarsaatigalugit iliuusissat pingaartitassallu arlallit tikkuartorneqarput.
marsip 02-at 2009 06:42
Isumasioqatigiinneq taaguuteqarpoq ”Ilaqutariit meerartallit ikiorserneqartarnerat”.
Ilaqutariinnut Sullissivinnut qitiusumit tapiissuteqartarnerup isumannaannerusumik aaqqinneqarnissaa pisariaqarpoq - sulisoqarneq kisiat eqqarsaatiginagu, aammali sullissiviit illutassaqarnissaat eqqarsaatigalugu. Angajoqqaat perorsaanerminni najoqqutassaannik suliaqarnissaq aamma atorfissaqartinneqarpoq.
Sumiiffinni tamani isumaginnittoqarfiit, angajoqqaat, atuarfiit, meeqqeriviit, peqqinnissaqarfiit allallu susassaqartut meeqqat inuusuttuaqqallu immikkut isumassorneqartariaqartut pillugit suleqatigiittarnissamik isumaqatigiissusiortariaqarput. Meeqqat inersimasullu meeqqat pisinnaatitaaffiinik qaammarsarneqartuarnissaat pisariaqarpoq.
