Angajoqqaat akissummik utaqqisariaqassapput
Radioaviisimi oqaluttuareriikkatsitut, kommunip akiliutigititai ukiortaamiit qaffanneqaqqimmata, angajoqqaarpassuit aalassassimaarput. Naak akitigitat Kommunip 2012-imut missingersuutaanut kommunalbestyrelsep akuerisaanut ilaagaluartut kommunimi politikerit Naalakkersuisunit immikkut akuerineqarlutik misissortippaat, akit 2011-mi atuuttut uterfigeqqinneqarsinnaanersut.
Kisianni Kommuni aamma allanik naatsorsuutigineqanngitsunik aningaasartuutissaqartoq maanna paasinarsivoq.
Qaqortumi meeqqerivimmi oqoqalersimavoq. Narsami atuarfik ilaatigut asbesteqarpoq, atuartullu anginerit allami atuartinneqarallartariaqarlutik. Aamma ukioq-manna ukiunit allanit aputeqarnerummat, aputaajaasoqarnerussaq.
Tamakkununngalu 2,2 millionit koruunit immikkut ittumik aningaasartuutaassasut naatsorsuutigineqalerpoq.
Taamaammallu meeqqerivinni akiliutit pillugit aalajangernissaq kinguartinneqarpoq.
Meeqqerivinnut akiliutit siorna atuuttut uterfigineqassappata, tamanna kommunimut 850.000 koruuninik naleqassaaq, tamannalu kommunep aningaasaqarneranut qanoq sunniuteqassanersoq paaseqqaarlugu aalajangertoqassasoq, tallimanngormat ataatsimiinnermi aalajangiunneqarpoq.