Angajoqqaat ajornartorsiornerat meeqqanut kingunerlussinnaasarpoq

Nunatsinni meeqqat 22%-ii inuunerminnik naammagisimaarinninngitsuupput.

Taama meeqqat atuartut peqqissusaat pillugu misissuineq saqqummiussaqarpoq. Meeqqat sisamaagaangata ataaseq sapaatip-akunneri tamaasa niaqorlullunilu sinissaaleqisarpoq. Meeqqat pingajorarterutaat uumisoqqajaasarput, tallimaagaangatalu ataaseq sapaatip-akunneranut ataasiarluni nikallungarujussuartarluni.

Meeqqat inuusuttuaqqallu peqqissusaannik misissuinermut suliamik aallartitsisoq nakorsaq Johan Michael Pedersen erseqqissaavoq, meeqqat tamarmik atugarliuuteqartuunngimmata, 22 procentilli atugarliortutut inuunerminnilu naalliuuteqartutut nalilerneqarmata, meeqqallu inuunerminnik naammaginninnginnerulersimanerannut avatangiisinit tatisimaneqarnerulersimaneq pissutaanerpaasoq.

- Ukiut 15-it matuma siornagut inuiaqatigiit meeqqanut piumasaat ullumikkumut naleqqiullutik annikinnerujussuupput. Ullumikkut meeqqat atuarnikkut angusassatigut piumasaqarfiginerulersimavagut, tamatumalu saniatigut meeqqanik sumiginnaaneq atorneluinerillu takussaanerujussuanngornikuullutik. Johan Michael Pedersen oqarpoq, meeqqanit atugarliortutut nalilerneqartunit 22 procentinit 5 -10 procentillu akornanniittut atugarliuissortuusut, tassa tobatortuunngikkunik, imigassamik imaluunniit aanngajaarniutinik allanik atornerluisuusut.

Kujataani Perorsaanikkut tarnikkullu siunnersuisarfimmi pisortaq Else Poulsen oqarpoq, meeqqat tatisimaneqarnerulersimanerat assigiinngitsunik peqquteqartoq:

- Ilaqutariit, pingaartumik angajoqqaat atugarisaat apeqqutaasorujussuusinnaasarput. Angajoqqaat imigassamik ajornartorsiornerat, imminnut persuttaasarnerat kiisalu pinerluttarnerat meeqqanut assigiinngitsutigut sunniuteqarsinnaasarput. Else Poulsen nassuiaavoq.

Aamma oqarpoq, angajoqqaat ilaat tarnimikkut napparsimasinnaasartut, taamaakkaangamillu angajoqqaatut piginnaasaat killeqartorujussuusarluni. Tamakku meeqqat atugarliulersarnerannut pissutaaqataasarnerat ilisimaneqarpoq.

- Ikiorsiiniarnerit naammaginanngillat, isumaqarpunga arlaatigut iliuuseqassagaanni sulisutut nukissaqartuarnissaq kiisalu suliffimmi atugarisat pingaaruteqartorujussuusut. Taamaattumik ilinniarneq, ilinniaqqinneq suliffimmilu assigiinngitsutigut atugarisat pitsaanerunissaat pingaartikkaanni aamma iliuuseqarfigisassat annertunerulissagaluarput. Else Poulsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat