Angajoqqaat 344 millionit koruuninik akiitsoqarput
Meeqqanummi akiilersuisut ukioq manna 344 millionit koruuninik pisortanut akiitsoqarput.
- Innuttaasut akiligassallit akisussaaffeqarnerusariaqartut, KANUKOKA-p siulittaasua, Palle Jerimiassen oqarpoq.
Angajoqqaat qitornallit soorlu avissimappata aappaasoq meeqqanut akilersuisussaasarpoq.
Angajoqqaat akilersuisut ilaat akiitsuminnik sumiginnaallutik pisortanut akiitsorpassuaqalersimasuusarput
akiitsullillu akisussaassuseqarnerusariaqalersut, KANUKOKA isumaqarpoq.
- Tassami pinngitsooratik akiligassaagunik akilerneqartariaqarput, aamma inuit
akisussaaffitsik taanna pinngitsoornagu naammassisariaqarpaat, Palle Jerimiassen oqarpoq.
Meeqqanut akilersukkanut 2015-imi ukiortaami 329 millionit koruunit akiitsorineqarput, ukioq manna ukiortaami 344 millionit koruuninngorsimallutik. Akiliitsitsiniarnermilu sullissinerup aaqqiiffigineqarnissaanut kommunit kissaatigiuarsimasaat uterfigineqartariaqartoq, Palle Jeriamiassen isumaqarpoq.
- Akiliisitsiniartarnermi sullissineq inunnut qaninnerusariaqartoq aammalu akiligassaqaraanni arlaatigut iliuuseqarfigineqarsinnaanissaanut periarfissanik ujartuisoqartariaqartoq, Palle Jerimiassen oqarpoq.
Innuttaasut pisortanut akiitsui katillutik 875 millionit koruuniupput, assersuutigalugu inuup ataatsip
agguaqatigiissillugu akiitsui 2016-imi ukiortaami 16.000 - 17.000 koruuniupput.
- Tamatta iliuuseqartariaqarpugut aamma kommunit qangali nilliaatigiuarpaat, aamma innuttaasut akisussaaffitsinnik - akisussaaffigigatsigu akiliinissarput, taanna aamma kivittariaqarparput, KANUKOKA-p siulittaasua, Palle Jerimiassen oqarpoq.
