Angajoqqaarsiat ingerlaaqatigiilerput

Meeqqat sumiginnagaasartut pissusaat sakkortusigaluttuinnarmata, angajoqqaarsiaasartut atugaasa pitsaanerulernissaat, aamma meeqqat inuusuttullu innarluutillit sullinneqarnerat naammaginagu, marsip aallaqqaataani angajoqqaarsiaasartut ingerlaaqatigiinnissaat marsip ulluisa aallaqqaataanni ingerlanneqassaaq.

Angajoqqaarsiaasartut peqatigiiffiata siulittaasuata, ingerlaaqatigiinnissaq Ellen Sofie Chemnitz-ip ima tunngavilersorpaa:

- Akerliussutsimik takutitsiniarnitsinnut pissutaavoq, meeqqat sakkortuumik sumiginnagaasartut angajoqqaarsianut inissitassat amerligaluttuinnarmata, aamma meeqqat sumiginnagaasartut sammineqarnissaminnik pisariaqartitsinerat pisariuneruleraluttuinnarmat. Angajoqqaarsiaanermi meeqqat nalinginnaasumik sakkortusigaluttuinnarnerat angajoqqaarsianut artornarneruleriartorpoq, tamannalu naammagiinnarsinnaajunnaarparput. Ellen Sofie Chemnitz oqarpoq nangillunilu: Meeqqat angajoqqaarsianut inissittariallit inersimasunik pisariaqartitsilluinnartut amerligaluttuinnarput, allaat angajoqqaarsiat angerlarsimaffinniiginnavittussat ilaatigut pisariaqartinneqaleraluttuinnarlutik.

Suliffeqaatigaluta angajoqqaarsiaasarnissarput artornarpallaalersimavoq, meeqqallu sakkortuumik sumiginnagaasimasut ulloq unnuarlu inersimasunik pisariaqartitsisarput. Isumaqarpugut aningaasarsiutigalugu angajoqqaarsianik Nuup kommuneani pilersitsisoqarnissaa pisariaqalersimasoq, Naalakkersuisunut aamma erseqqissarusupparput, aningaasarsiutigalugu angajoqqaarsiaasartut pisariaqartinneqarnerat annertuneruleraluttuinnartoq.

Ellen Sofie Chemnitz aamma oqarpoq, meeqqat angerlarsimaffiup avataanut inissinneqartussat qassiuneri suli ilisimaneqanngimmat, tamanna naammaginanngilluinnartoq.

- Meeqqat inuusuttullu sumiginnakkat sullinneqarnerini kisitsisit pisariaqarluinnarput, taamaammat kommunit kisitsisaataat utaqqiinnarnagit Namminersornerullutik Oqartussat, suliassaminik maannakkorluinnaq ingerlatsisariaqarput.

Angajoqqaat innarluutilinnik meerallit atugaat aamma naammaginanngitsut, Ellen Sofie Chemnitz oqarpoq, taakkulu atugaasa aamma pitsanngorsaavigineqarnissaat anguniarlugu akerliussutsimik takutitsinissaq ingerlanneqassaaq.

Akerliussutsimik takutitsiniartut neriupput aningaasarsiutigalugu angajoqqaarsiaasartunik peqalernissaa inatsisartunit akuerineqassasoq, innarluutillit angerlarsimaffiinik naleqquttunik peqartoqalernissaa aamma neriuutigineqarpoq.

Akerliussutsimik takutitsinermi peqataasussat tassaapput PIP, innarluutillit peqatigiiffiat aamma Nuummi angajoqqaarsiaasartut peqatigiiffiat.