Angajoqqaarsiat atugaat Kalaallit Nunaanni ajornerusut

Kalaallit Nunaanni angajoqqaarsiat atugaat meerarsianillu sullissineq tupaallaataasimapput, angajoqqaarsiat nunanit avannarlerneersut peqatigiiffiat ataatsimiimmat.
Allattoq Najaaraq Egede
septembarip 06-at 2008 17:00

Peqatigiiffik angajoqqaarsianit aamma meerarsianik sullissisartuusunit ilaasortaaffigineqartoq, Nordic Foster Care Association, Nofca-mik naalisarlugu taaneqartartoq, Nuummi ataatsimiippoq.

Peqatigiiffiup siulersuisui ulluni kingullerni ataatsimiipput, ataasinngornermiillu inuit 65-it peqataaffigisaannik ataatsimiittoqassaaq.

Sooq Kalaallit Nunaanni ataatsimiikkumasimavisi Nofcap siulittaasua, Ingrid Nilsson Helsingborgimeersoq aperaarput, imalu akivoq.

- Kalaallit Nunaanni meerarsianik sullissineq siuarsartariaqarmat, akivoq.

-Angajoqqaarsiat atugaat assut tupaallaatigisimavagut. Kalaallit Nunaanni nunanilu avannarlerni allani pissutsit assigiinngeqaat.

Nunani allani meerarsiaqalersussat meeraq pillugu nalornissutaasinnaasut pillugit ilisimateqqissaarneqartarput, meeqqap pisariaqartitai suunersut angajoqqaarsiassaasa nalunngereerniassammatigit. Ilaatigut aamma ilisimatinneqareertarput meeraq qanoq sivisutigisumik angajoqqaarsianiissanersoq.

- Aamma meeqqanik angajoqqaarsianut inissiinialernermi inunnik isumaginnittoqarfiit qanimut suleqataatinneqartuartarput, meeqqap tassaniinnera tamaat, maanili Kalaallit Nunaanni pissutsit allaalluinnartuusut paasivarput. Tusartuarparput Kalaallit Nunaani angajoqqaarsiat namminivik sorpassuit sulissutiginiartariaqartaraat, Ingrid Nilsson oqarpoq.

Nunani avannarlerni misilittakkat Kalaallit Nunaata ilikkagaqarfigissagai, siulersuisut ulluni kingullerni ataatsimiittut neriupput.

Svenskit Nofcami siulittaasuutitaat, Ingrid Nilsson 2006-imi siulittaasunngorpoq, ileqquuvorlu nunani avannarlerni nikittaalluni siulersuisuutitaqartarneq.

Ukiuni tullerni marlunni Islandi siulittaasuutitaqassaaq, siulittaasuussalluni Soffia Ellertsdottir.

Ataatsimeersuarnivik ataasinngorpat marlunngorpallu Nuummi ingerlanneqassaaq.