Angajoqqaarsiat assigiinngitsumik pineqartarput
Tamatuma peqatigisaanik aaqqissuussaanikkut isumaginninnermi suliatigut arlalinnik ineriartortitsinermi siunnerfeqartumik suliniuteqarnissamik pisariaqartitsiviusumik unammilligassaqartoq misissuinerup takutippaa.
Misissuineq ilaqutariinnermut Naalakkersuisoqarfik sullillugu Deloittep suliaraa.
Kommunit sisamaasut Deloittep 2012-imi upernaakkut tikeraarpai, ilaatigullu inissiisarnermi suliat misissorlugit, matumanilu sullissisut, angajoqqaarsiat meerarsiaasimasullu apersorneqarlutik.
Angajoqqaarsianngortartut pillugit misissuinerup nutaap paasinarsisippaa, sullissineq nukittorsarneqartariaqartoq. Suliamik ingerlatsinermi qaffasissuseqassigiiaanngilaq, pisunilu amerlasuuni meeqqat ataasiakkaat pisariaqartitaat ineriartorfigisinnaasaallu nassuiaatigineqarneq ajorput. Sulianik ingerlatsisup ilaqutariillu paaqqutarinnittartut meeqqap oqaluttuassartaa ajornartorsiutaalu ilisimanngikkunikkit ilaqutariit meeqqallu imminnut naleqquttuutinniarnerat ajornakusuulertarpoq, Deloittemit taama allapput.
Ilaqutariinnik paaqqutarinnittartunik amerlanernik pissarsiortoqassasoq aamma ilaqutariit paaqqutarinnittartut ilinniarnissaminnut periarfissaat pitsanngorsarneqassasut kiisalu pisinnaatitaaffimminnik ilisimasaqarnerulersinnissaat kaammattuutigineqartoq, Deloittep nalunaarusiamini ilaatigut kaammattuutigaa.
