Angajoqqaarsiat akerliunialerput

maajip 06-at 2005 07:18

Nuummi ilaqutariit meeqqanik angerlarsimaffiup avataanut inissinneqartartunik tigummiaqartartut ualeru nal. Pingasut qeqqanut Ilaqutariinnermut Pisortaqarfiup silaaniit aallartillutik akerliussutsimik takutitsiniarput. Akerliussutsimik takutitsinissami ”Sumiginnagaaneq” qulequtarineqassasoq, aaqqissueqataasoq Ellen Sofie Chemnitz ilisimatitsivoq.

- Isumaqaratta pisortat sumiginnaanerisigut meeqqat angajoqqaaminnit sumiginnakkat angerlarsimaffiullu avataanut inissinneqartartut amerliartuinnartut, akerliussutsimik takutitsiniarpugut, Ellen Sofie Chemnitz oqarpoq. Naalagaaffiit Peqatigiit Meeqqat pillugit Isumaqatigiissutaannik nunatta atsioqataaffigisaanik, Namminersornerullutillu Oqartussat meeqqat pillugit inatsisaannik malinnittoqannginnera, meeqqat sumiginnakkat amerliartornerannik kinguneqarsimasoq, Ellen Sofie Chemnitz tunngavilersorpoq.

- Inatsisit maleruagassallu tamakku nunatsinni atuutsinneqalermata meeqqat angerlarsimaffiup avataanut inissinneqartartut ikiliartulersimasussaangaluartut killormut ingerlasoqarpoq, Ellen Sofie Chemnitz oqarpoq, oqaatigaalu meeqqat angerlarsimaffiup avataanut inissinneqartartut ilaat uteqqiattumik inissinneqartartuusut, taakkulu inersimasunngortut ilaasa meeraat aamma angerlarsimaffiup avataanut ullumikkut inissinneqartartut ilisimaarigitik. Ellen Sofia Chemnitzip aamma oqaatigaa meeqqanik tigummiaqartartut pisortanit siunnersorneqartarnissamik tapersersorneqarnissamillu ulloq manna tikillugu suli amigaateqartut.

Nuummi ilaqutariit meeqqanik angerlarsimaffiup avataanut inissinneqartunik tigummiaqartartut akerliussutsimik takutitsinissaanni Ilinniartitsisut Kattuffiat Imak Isumaginnittullu Peqatigiiffiat PIP tapersersuiniarput.