Angajoqqaarsiassarsiornermi Nanortalimmut billetsi pilerisaarutigineqartoq

Roskildep Kommunia, illoqarfittut ikinngutigisaminit, Nanortalimmit, meeqqanik maajip qaammataani kingumut tikeraartoqassaaq.

Kommunit taakku marluk 1966-imiilli ikinngutigiilerput, ukiullu ingerlanerini Nanortalimmi Roskildemilu atuartut 100-t arlallit imminnut tikeraartarsimallutik.

Meeqqat nunatsinneersut angajoqqaarsiassarsinissaat siornatigut ajornartorsiutaasarsimanngikkaluarpoq, Roskildemili atuartumut angajoqqaarsiaarusuttartut, taamatullu illoqarfiit taakku marluk suleqatigiinnerinut ikiuerusuttut, ukiuni kingullerni ikiliartulersimanerat aaqqissuisut maluginiarsimavaat.

Taamaammat kommuni ilaqutariinnik 5. klassimi atuartuutilinnik, atuartumik kalaallimik maajip qaammataani najugaqartitserusuttunik maanna ujartuivoq.

Najugaqartitserusuttunillu pilerisaariniarluni kommuni unammisitsiniarpoq, meeqqat Roskildemeersut Nanortalimmut aggustip qaammataani angalanissap makitsissutigineqarnissaanut peqataasinnaassallutik.

Unammisitsinermullu peqataanissamut najugaqartitsinerup nalaani Roskildep Kommuniani najugaqarnissaq 5. klassimilu atuartuunissaq piumasaqaataavoq.

Kommunip taamatut unammisitsinermigut nanortalimmiuaqqanik maajip qaammataani najugaqartitserusullutik soqutiginnittut amerlinissaat neriuutigaat.