Angajoqqaarsiaq: Tasiilami meeqqat pilliutaapput
Tasiilap kommuniani aningaasatigut kipiluttunartorsiornermut atatillugu susassaqartitsiniarneq aamma sipaarniarfigineqartunut ilaavoq, tamanna inuusuttunut qanoq kinguneqassanersoq innuttaasut ilaannut Elisa Silassenimut apeqqutigaarput.
- Malugeqqaanngikkaluarpara, qineqqusaartoqarmalli paasilerpara sunaaffa taama amigaateqarsimatigisut paasilerpara. Sunaluunniit akissaqartinneqanngilaq meeqqaniit inuusuttunut sumilluunniit akissaqartinneqanngillat, Elisa Silassen oqarpoq.
- Inuusuttuaqqat meeqqallu eqqarsaatigalugit imigassamut aallareernikuupput, soorlu tallimanngornikkut unnulaartukkut anigaanni inuusuttuaqqat 15-16-17-t missaanni ukiullit aalakoortorujussuullutik aqqusinikkoortut takussaasarput. Tallimanngornikkut unnukkut fritidsklubbi ammatinneqarneq ajorpoq katersortarfillu unnukkut qulinut aatsaat ammartarluni, taamaattumik inuusuttuaraanerusut allamik sussaqanngillat, taama oqarpoq Tasiilami innuttaasut ilaat Elisa Silassen.
