Angajoqqaarsiaq isumallualerpoq

Allattoq Najaaraq Egede
marsip 29-at 2007 10:12

Angajoqqaarsianut tapisiaritinneqartartut qaffanneqarnissaannik Demokraatit siunnersuutaat Inatsisartunit tupaallannartumik ippassaq tapersersorluarneqarpoq. Tusagaq Sisimiuni pingasunik meerarsiaqartup Sofie Kleistip neriunartoqartippaa, ukiunimi arlalinni aningaasanik naammattusaarisariaqartarsimavoq.

-Aappaatigut oqiliallannarpoq, isumakkut, tassami eqqarsaatigigaanni ukiut 20-t taakku aningaasarsiarititaasarut nkinnikuunngillat, taavalu ullumi 2007-iulluni, suut tamarmik akitsoruttorfianni. Taamaammat saniatigut paarsiniarlutalu aamma suliffeqartariaqartarpugut taakkua paasinermut aningaasarsiat ilaat meeqqanut atoqqittariaqaratsigit.

Ulluinnaqarnerput allani ulluinnartut ippoq. Paarisartakkagut taakkuinnaaneq ajorpoq, angajoqqaarsiat amerlanerpassuit aamma manninneq meeraqartarput pilersugassaminni. Uanga marlunnik meeraqarpunga aappaa qanittukkut 18-iliisoq, suli pilersortariaqarpara atuarmat, nangippoq.

-Aningaasartuuteqartaqaagut. Nerisassat atisassallu kisimik piuneq ajorput. Meerartagut ullutsinni malinnaasariaqarput, aamma meeqqat tigummisagut. Timersortarput, aallartarput. Timersorneq akikitsuinnaanngilaq: Atortut, peqatigiiffimmut akiliutissaq, GM-ernermi kontingenti. Tamakku tamarmik naatsorsugaasarput uagutsinni.

Sofie Kleist meeqqami marluk saniatigut pingasunik - arfinilinnik, aqqaneq-marlunnik 13-inillu ukiulinnik –meerarsiaqarpoq, meerarlu ataaseq qaammammut 3298 koruuninik tapisissutigisarpaa. Sofie Kleistikkut uinilu ukiuni arfineq-marlunni ataannartumik meerarsiaqarput.

Angajoqqaarsiaanermut tapisiat qanoq qaffatsiginissaat Naalakkersuisut maanna misissuleruttorpaat. Ilaqutariinnermut Naalakkersuisup Aleqa Hammondip neriorsuutigaa nalunaarusiaq 2008-mi saqqummersinneqassasoq. Taassuma saniatigut quppersagannguamik angajoqqaarsianut agguaasoqarumaartoq ilisimatitsissutigaa.