Angajoqqaarsianngorusuttunik naliliisarneq sukateriffigineqarpoq

Arnarsiaasoq 20-iinnarnik ukioqartoq, ukiuni qulingiluani pineqaatissinneqarsimasunut inissiisarfianiittussanngorlugu Nuup Eqqartuussiviani ullumi eqqartuunneqarpoq.

Kommuneqarfik Sermersuup Tungiuinermut Ingerlatsiviata meeqqanut ilaqutariinnullu immikkoortortaani pisortaq Mette Sonniks, sukaterineq pillugu ima oqarpoq.

- Ilaqutariinnermut Peqqissutsimullu Pisortaqarfimmiit kommuni taamani nakkutilliilluni pulaarneqarpoq, taama pisoqarnerata kingorna pissusissamisoortumik, Mette Sonniks aallarniivoq.

- Ataatsimiinnerup nalaani innersuussutinik suliaqartoqarpoq, ilaatigut periutsit sukaterinissallu kommunimit misissorneqassallutik - pingaartumik nakkutilliisarnermut pulaartarnermullu tunngasut pillugit. Ukiumut minnerpaamik ataasiarluni angajoqqaarsianut pulaartarnissaq maleruagassaavoq. Pisunili amerlasuuni amerlanerusarput, Mette Sonniks oqarpoq.

- Suliat aalajangersimasut tamatumani apeqqutaasarput. Meeqqanik inissiisarnermik suliallit inunnik isumaginninnermut siunnersortit ilaqutariinnut siunnersortitut sulisutsinnit qanimut suleqatigineqartarput. Taama iliornitsigut sukaterivugut suliallu ullumikkut amerlanerusunit malinnaavigineqartarput, suliassaqarfimmut pisortaq oqarpoq.

Akuersisarnermik periuseq sukateriffigineqarnikuuvoq. Angajoqqaarsianngorumallutik qinnuteqartut sooq angajoqqaarsianngorumanersut paasiumallugu kommunip angajoqqaarsianut siunnersortaanit ataatsimeeqatigeqqaarneqartarput. Peqqinnissaqarfimmiit peqqissutsimut uppernarsaammik aammalu pinerlussimannginnermut uppernarsaammik qinnuteqartut tunniussisussaatitaapput. Taamaattoqareeraangat isertitaqartarnermik paasissutissat inuttullu nalinginnaasumik atukkat pillugit paasissutissat kommunimit pissarsiarineqartarput. Naggataatigullu ilaqutariit pulaarneqartarput. Angajoqqaarsianili kommunimit akuerineqarsimasuni meerarsiaq ataatsimik ukiulik qanoq ililluni toqusinnaasimanersoq Mette Sonniksip akisinnaanngilaa.

- Pisut ilaanni pitsaasumik akissutissaqartoqartanngilaq. Qanoq ukioqarneq perungassutsitut isigissallugu immaqa eqqorpallaanngilaq. Inoqarpormi 20-nik ukioqartunik meeraqarlutillu ilaqutaqartunik ingerlalluartunillu. Inuit qassinik ukioqarnersut pivallaarnagu qanoq perungatiginerat aamma isiginiartariaqarparput. Taamaammat 20-nik ukiulik arnarsiaasorlu inuusuppallaarsorinarpoq, Mette Sonniks oqarpoq.

Kommuni akissussaaqataava?

- Tamanna oqaaseqarfigerusunngilara, imaanngitsoq kina akisussaaqataanersoq pingaartinnginnakku. Pisimasormi ajuusaarnaqaaq. Taama pisoqarsinnaaneranut tunngatillugu eqqummaarippallaarsimagunanngilagut. Taama pisoqarsimanera sakkortoorujussuuvoq ajorluinnarlunilu, soorunalumi tamanna ilikkagaqarfigaarput, Mette Sonniks naggasiivoq.

Meeqqanik inissitassanik Kommuneqarfik Sermersooq peqartuarmat, angajoqqaarsiat aaqqiissutaapput pitsaasut. Taamaammat ilaqutariinnut siunnersortinik amerlanerusunik pissarsinissaq aamma angajoqqaarsianut siunnersortinullu pikkorissartitsisarnissat kommunip sulissutigai.