Angajoqqaajunerluttut qitornaat aserorterisarput

Inuusuttuaqqat aqqaneq-marluunniit 14-nut ukiullit serlersaaralutillu aserorterisartut amerliartuinnarput.

Inuusuttuaqqat allat piinik inoqatiminnillu ataqqinninnissamut perorsarneqartannginnerat pissutaasoq, SSPK-mi suleqataasoq oqarpoq.

SSPK-mi suleqataasoq politeeq Poul Hansen oqarpoq asimi illuaqqat kisimik aserorterneqarneq ajortut aammali illoqarfimmi illut, igalaat angallatillumi aserorterneqartartut.

Amerlasuutigut inuusuttuaqqat pissutissaqaratik allat piinik aserorterisarput. Politeeq Poul Hansen atuarfinni meerarpassuarnik inuusuttuararpassuarnillu oqaloqateqartartoq oqarpoq allat piinik inoqatinillu ataqqinninnissamut inuusuttuaqqaat angajoqqaaminnit perorsarneqartannginnerat inuusuttuaqqat sorraatsunngortarnerannut soqutigisaqannginnerannullu pissutaasoq. Poul Hansen oqarpoq inuusuttuaqqat aqqaneq-marlunniit 14-inut ukiullit aserorterigajuttuusut.

– Aammali akoqarput qulingiluaannarnik ukiulinnik, Poul Hansen oqarpoq nangipporlu: ileqqupalaaq kusanaatsoq tamanna inuiaqatigiittut akuersaaginnarsinnaanngilarput taamaattumik allanngortitsiniarluta aallartittariaqarpugut. Poul Hansen isumaqarpoq nammineq allallu piinik ataqqinninnissamik ilinniartitsineq iliuutsit ilagisinnaagaat.

– Aallartipallattariaqarpugulli angajoqqaat suleqatigalugit, Poul Hansen oqarpoq.