Anersaartuut inuunermik annaassivoq

Aalborgimi Napparsimmavimmi nakorsaaneq maskiina uummammut-puannullu misileraatissaq mikisunnguaq, nammineq ineriartortitseqataaffigisimasani, misilikkiartorlugu 2006-imi Kalaallit Nunaannukarpoq. Aviisimi Politikenimi tamanna allaaserineqarpoq.

Maskiina ikiorsiullugu napparsimasoq anersaartortinneqarsinnaavoq, aallu timimi ingerlaarnera taassuminnga aamma iluaquserneqarsinnaalluni. Anersaartuutinut nalinginnaasunut naleqqiullugu maskiina taanna mikisunnguaq silaannarmi qutsissumi aamma atorneqarsinnaavoq.

- Nukappiaqqap Lundby Efterskolemeersup timaa nillorpallaarmat, uummataalu unittoormat, maskiina taanna angallattagaq atorlugu annaanneqarpoq, nakorsaaneq Benedict Kjærgaard aviisimut Politikenimut oqarpoq.

Maskiinat uummammut-puannullu atorneqartartut napparsimmavinniinnaq nalinginnaasumik pigineqartaraluarput, qulimiguulilli annassiniarnermi atorneqartartoq maskiinamik taamaattumik peqarallartillugu efterskolemi atuartoq ingerlaannaq uummarsarneqarsinnaasimavoq.

Puulukinik issimasoqarluni Kalaallit Nunaanni qulimiguulimmik timmisartornermi misilinneqartoq tassaavoq immami nillertumi ipillutik uummammik unittoorsimasunik annaassiniarnissaq. Aalborgimi Napparsimmavimmi uummammik-puannillu pilattaavimmi nakorsaanerit qullersaat, Jan Jesper Andreasen, aviisimi Politikenimi taama ilisimatitsivoq.

Nakorsat suleqatigiittussat maskiinamik taamaattumik timmisartumi atuipallannissamut sungiusarneqareerput, ipisimasut napparsimmaviliaanneqarneranni ikiuineq taamaalilluni aallartinneqareertassammat.

Efterskolertut arfineq-marluk imaaniit annaanneqareerlutik uummamminnik unittooraluartut inuunerat ulorianartorsiunngitsoq ilisimatitsissutigineqarpoq.