Aneerasaartarfimmit nakkartoqarnera akisussaaffigiumaneqanngilaq
Nukappiaqqap 14-inik qaammatillip quleriit arferngannit tallimanngormat nakkarneranut atatillugu apeqqut taanna akissutissarsiniarneqarpoq.
Nukappiaqqap Nuummi Tuapannguani aneerasaartarfimmit meterinik 16-inik nakkerneranut suna peqqutaarpiarnersoq suli erseqqissumik paasineqanngilaq. Inissiarsuulli sananeqarnerani sannarluttoqarsimaneratigut inissiarsuup aneerasaartarfiisa ilumut malittarisassanik unioqqutitsinersut apeqquserneqarsinnaavoq.
Inissiarsuarmi najugaqartuusimasup illup aneerasaartarfiullu assiaqutaata centimeterinik 16-inik akunneqarnerat ukiut marluk matuma siorna naammagittaalliutigisimavaa, tamannalu sanaartornermi malittarisassat naapertorlugit annertuallaaqaaq taamaattumillu unioqqutitsinerulluni.
Akunnera ima annertutigaaq, allaat meeraq tassuuna nakkarsinnaalluni, taamaammat taamatut kukkuneq qanoq iliornikkut pisimanersoq, minnerunngitsumillu kiap akisussaaffigineraa maanna apeqquserneqarpoq.
Akisussaasuusinnaasut attuumassutillit tamaasa oqaaseqartinniaraluaratsigit, KNR-ip saaffigisai tamarmik oqaaseqarusunngillat.
Inissiat INI A/S-imit aqunneqarput, aningaasalersuisarfiup Illuut A/S-ip pigisarai Permagreen Grønland A/S-ilu sanaartortuulluni. Siuliani taaneqartut arlaalluunniit suliamut tunngatillugu oqaaseqarusunngitsut KNR-imit ullumi paasivarput.
Elias Inûsugtup, nukappiaqqamut 14-inik qaammatilimmut ataataasup, Tuapannguani inissiarsuarnik sanaartornermut atatillugu isumannaallisaanermi piumasaqaatinik unioqqutitsisimasutut Namminersorlutik Oqartussat politiinut naluaarutigisimavai.
