Ane Sofie Hardenberg aallartitatut toqqarneqarpoq

Nunatsinni nerisassiornermik soqutigisallit ilaat Ane Sofie Hardenberg igasullu marluk aappaa Ålandimeersoq aappaalu Savalimmiuneersoq nunani avannarlerni nerisassiornermik soqutigisallit aallartitaattut nunani avannarlerni ministerit Björneborgimi sapaatip akunnerani kingullermi ataatsimiimmata toqqagaapput.

Taamaalillutik nunani avannarlerni nerisassiornermik soqutigisalllit aallartitaat aqqanillit pingasunik ilapput. Nerisasssiornermik soqutigisallit aallartitaasa nunat avannarliit nerisassiornermut suliniutaannik siammarterinissaq suliarissavaat.

- Nunatsinni nerisassat nunani avannarlerni allani ilisimaneqarnerulernissaannut periarfissatut tamanna isigaara, Ane Sofie Hardenberg oqarpoq.

- Soormi puisit neqaat arferillu neqaat mamasaakkat misilissinnaasanngilaat? Ane Sofie Hardenberg aperaaq, nerisassaatitsinnillu eqqussinissamut killilersuinerujussuaq tikkuarlugu.

Nunatsinnilu nerisassat nunani allani soqutigineqarluarput. Ane Sofie Hardenberg oqaluttuarpoq immiorfimmit Carlsberg-imit qanittumi saaffigineqarsimalluni, nunatsinni naasut sorliit immiornermut atorneqarsinnaanerat isumaliutersuutigineqarmat.

Nunani avannarlerni nerisassiornermik soqutigisallit aallartitaat Sverigemi ukiaru oktobarimi naapissapput.