Ane Hansen: Soqutigisaqaqatigiiffiit ataatsimoortariaqalerput
Puisit amiisa EU-mut eqquteqqusaajunnaarnissaannut atatillugu akersuunnissami aammalu sunniiniarnissami kattuffik ataaseq nukittooq amigaatigineqartutut oqaatigineqarsinnaavoq, Ane Hansen oqarpoq.
Kattuffiit soorlu KNAPK, NUSUKA aamma Sulisitsisut kattuffiat, aalisarnermik soqutigisaqartut immikkut suliaqarput. Taakkuupput Ane Hansenip ataatsimoorfissaannik pilersitseqqullugit kaammattorumasai.
- Suliassani pingaaruteqartuni nunatta ataatsimoortumik soqutigisaani, assersuutigalugu aalisarnermut inatsisip suliarineqarnerani, aammalu nunanut allanut kiinnernermi nunatsinni aalisarnermik uumassusilinnillu soqutigisaqaqatigiiffiit ataatsimoorfeqannginnerat amigaataavoq, Ane Hansen oqarpoq.
Ane Hansenip kattuffiit aalisarnermik soqutigisallit saaffigissamaarpai, tassami kattuffiit peqatigiiffiillu ataatsimoorfigisinnaasaat aalisarneq pillugu suliniuteqarnermi tunngaviusinnaassammat.
- Nunani allani uagutsinnut assersuussinnaasatsinni, soorlu Danmarkimi, Norgemi Islandimilu taama ittunik kattuffeqartiterpoq, aamma naalakkersuisut atorluartartorujussuuaat, Ane Hansen oqarpoq.
