Ane Hansen: Qaasuitsup Kommunia avinnagu allaffissorneq nukittorsaneqartariaqarpoq

Qaasuitsup Kommuniata avinneqarnissaanut taasisitsinerup inernera aqutsinerup suleqatigiinnerullu pitsaanngitsumik ingerlaneranik takussutissaasoq, Inatsartuni ilaasortaq IA-meersoq Ane Hansen isumaqarpoq. Qaasuitsup Kommuniani innuttaasut kommunip arfineq pingasunik illoqarfittaqartup, 31-nillu nunaqarfittaqartup marlunnut avinneqarnissaa pillugu taaseqqammerput, amerlanerussuteqartullu akuersillutik taasipput.
Allattoq Dorthea Johansen
marsip 31-at 2014 08:34

Taasisitsinerup inernera aqutsinerup suleqatigiinnerullu pitsaanngitsumik ingerlaneranik takussutissaasoq, kommunalbestyrelsimut IA sinnerlugu ilaasortaq Ane Hansen isumaqarpoq.

-Qaasuitsup Kommuniata taasisitsinerata inerata takutippaa innuttaasut Qaasuitsup Kommuniata aqutsinera naammaginngitsorujussuugaat. Taamaattumik Inuit Ataqatigiinninngaanniit isumaqarpugut iliuuseqartoqartariaqartoq. Aammalu aaqqitassarpassuit eqqarsaatigalugit isiginnaaginnartoqarsinnaanngitsoq, Ane Hansen oqarpoq.

Qaasuitsup Kommuniani sulisut sullissinerup annertuallaarnera pissutigalugu uniinnartarsimanerat eqqaavaa, tamannalu kommuni avinneqarnissaanik kissaateqalersitsisinera peqqutaatippaat.

- Qinersinerup kingorna 2009-mi kommunalbestyrelsimi ilaasortat arlalissuit tunniutiinnareernikuupput, avinnissartik kisiat eqqarsaatigiinnalerlugu. Suliassarpassuillu suliarineqartussaagaluit uninngassutigineqaannalernikuullutik. Sunaluunniit aqqiissuussineq suliarineqanngikkuni igerlaqqissinnaannguilaq, taamaattumik uagut Inuit Ataqatigiinninngaannit isumaqarpugut iliuuseqartoqartariaqartoq, Ane Hansen oqarpoq.

Qaasuitsup Kommuniani sullissinerup Ilulissani kisimi ingerlanneqartarnera Ane Hansenip akuerisinnaanngilaa. Siunnersuutigaalu Ilulissani kisimi sullissineq ingerlanneqarnani illoqarfinnut aqutsineq agguarneqartariaqartoq. 

Aamma isumaqarpoq sulisut pisinnaatitaaffii ersarissut ilusilersorneqartariaqartut, nalorninatik sullissisinnaalerniassammata, taamaalinikkut innuttaasut qanimut sullinneqarniassammata.

- Kommunalbestyrelsitoqqap uuma qinersinerup siuliani kommunalbestyrelsiusimasut ingerlataat aallartinneqarsimasoq inaarsarneqartariaqarpoq. Tassalu suna tamaat qitiusumik Ilulissaniit aqukkunnaarlugu aqutsineq siammarnerusariaqarpoq. Illoqarfikkaartumik allaffisornermi aqutsineq nukittorsarneqartariaqartoq innuttaasunik pitsaasumik sullissinnaalersillugu, Ane Hansen oqarpoq.

Siumut sinnerlugu kommunalbestyrelsimut ilaasortaq Palle Jeremiassen isumaqarpoq taasisitsineq naammassereersoq, suliassartaalu suliarineqartariaqartut.

- Taasineq piareerpoq, taasiartortut 81 procentiisa kommunip avinneqarnissaa kissaatigaat, tamannalu tusaanngitsuusaarneqarsinnaanngilaq allanik peqqutissarsiorluni allamut saasaarineq atorlugu. Politikerit suliassinneqarput suliassartillu suliarisariaqarpaat imminnut tupinnartuliarinatik partiitut inuttulluunniit qineqqusaaratik kinguarsaanatillu.

Siumut sinnerlugu kommunalbestyrelsimut ilaasortaq Palle Jeremiassen tusagassiuutinut nalunaarutimini ilaatigut taama allappoq.

Palle Jeremiassenip qanimut oqartussaaqataaneq qanoq ingerlalluartigilersinnaanersoq apeqquserpaa.

- Kommunit arfineq-pingasuugallarmata allaffissornermut aningaasartuutit 170 millionit koruunit sinnilaarlugit atorneqartarput, massakkullu 193 millionit koruunit atorneqartarlutik kommunimi ataatsimi, taamaattumik taanna tunngavilersuutitut atorsinnaanngilaq, akikinnerulinngilarmi kommuni ataasiinnanngormat, Palle Jeremiassen tusagassiuutinut nalunaarutimini ilaatigut taama allappoq.

Palle Jeremiassen oqaaseqartinniaraluaratsigu pissarsiarinngilarput.