Ane Hansen: Pisassiissutit ikinnerpaaffii pisassuutigineqaqqissinnaapput
Taamaattorli aappaagu arfattassinneqarnissarput naatsorsuutigissagipput, Aalisarnermut, Piniarnermut Nunalerinermullu naalakkersuisup Ane Hansenip oqaatigaa.
- Aappaagumut arfattassinneqarnissarput siunertaralugu periarfissat assigiinngitsut ulluni makkunani oqaloqatigiissutigivavut. IWC-mi allattoqarfik oqaloqatigereerparput, periarfissallu assigiinngitsut sulisutta Danmarkimilu ministereqarfiup sulisui peqatigalugit massakkut misissuataarpavut, Aalisarnermut, Piniarnermut Nunalerinermullu naalakkersuisoq Ane Hansen oqarpoq.
Periarfissallu suuppat? Aalisarnermut Piniarnermullu naalakkersuisup tamanna ima nassuiaateqarfigaa:
- Immikkut ittumik ataatsimeersuarnissamut kissaateqarsinnaavgut, kisianni aamma pisassat ukioq manna pisassarineqartut imaluunniit pisassat amerlisat aallaavigiinnassagutsigit tusarniaanerit suli aqqutigineqarsinnaapput, aammalu periarfissat kingullerpaartarivaat uagut nammineq Nunatta piujuaannartitsinissamik killiliussat iluanni imminut pisassissinnaanerput, Ane Hansen oqarpoq.
Nunatta neqinik avataaniit eqqussuinerata sapinngisamik annikillineqarnissaa, imminullu pilersornerulernissarput anguniarneqartariaqartoq, Naalakkersuisut oqarput:
- Nunatta inuisa Nunatta pissarititaanik imminut pilersornerulernissaat Naalakkersuisut siunniunnikuuaat, anguniagarlu taanna annertoorujussuuvoq.
- Anguniarutsigu nunanit allaninngaannit neqissarpassuit eqqussukkavut annikillisinniarutsigit taakkua taartissaqartariaqarput, taartissaattullu isigisavut piujuaannartitsinerup killigitat iluanni pisassiissutigineqarnissaat soorunami anguniagaraarput, Aalisarnermut, Piniarnermut Nunalerinermullu naalaakkersuisoq oqarpoq.
Nunarput ukiumut katillugit 211-nik arfattassinneqartarpoq, taakkualu 221-nut amerlineqarnissaat kissaatigineqaraluartoq, IWC-mi sapaatip-akunnerata siuliani sisamanngormat taasissutigineqarmata nunat ilaasortat 34-it itigartitsipput, ikinnerussuteqartullu 25-t akuersillutik.
