Ane Hansen: Naalakkersuisut qaleralittassiipallanniaritsi

Aasianni suliffissuup Naalakkersuisunit annertunerusumik iliuuseqarfigineqarani uninngatiinnarneqarneranut, Inatsisartut Aalisarnermut Piniarnermullu Ataatsimiititaliaanni siulittaasoq Ane Hansen IA-meersoq, naammaginniinnarunnaarpoq.

-Aalisartunut nunamilu suliffissuarni sulisunut kipiluttunartumik utaqqisitsineq tamaanga killeqartariaqarpoq. Baffinip imartaani siornali 2.500 tonsit qaleralittassiissutigineqarput maannalu ukiup affaa sinningaatsiareerpaa suli agguaanneqaratik, tamannalu akuersaarnarunaarpoq Ane Hansen allappoq.

Erseqqissaatigaa Baffinip imartaa piffissami sivikitsuinnarmi aalisarfigineqarsinnaasoq, pisassiissutigineqartullu ukioq manna tamakkerneqassappata aalisartussat qangali piareersarlutik aallartissimasussaagaluartut nalornisinneqarlutik suli utaqqisut.

-Inuutissarsiornermi piareersimalluarluni siumullu pilersaarusiorluni inuutissarsiornermik ingerlatsinissaq Nalaalakkersuisut kajumissaarutigisarpaat. Pisorlu una kajumissaarutaannut naapertuutinngilluinnarpoq, taamaattumik Naalakkersuisut piaartumik pisassanik agguaassisariaqarput, Ane Hansen uparuaavoq.

Naalakkersuisut qaleralittassanik agguaassinerminni sulissuarni uninngasoqarfiusuneersut salliutittariaqaraat, Ane Hansen allappoq.