Ane Hansen: Naalakkersuisut nipangersimanerat ilungersunarpoq

Danskit Inatsiseqarnermut ministeriata Lene Espersenip nunatsinni naalakkersuisut Canadamit puisit amersisaleqqinniarlutik aalajangernerannut akerliunini suli aalajangiusimagini, ippassaq oqarpoq. Danskit naalakkersuisuisa taama pissusilersornerat nunatsinni naalakkersuisunit suli oqaaseqarfigiumaneqanngilaq. Naalakkersuisutta nipangersimaannarnerat, Inatsisartut Aalisarnermut Piniarnermullu Ataatsimiititaliaanni siulittaasup IA-meersup Ane Hansenip akueriuminaatsippaa. Ane Hansen ima oqarpoq:

- Oqaatsikka nangeqqissanngilakka, kisianni massakkut pisumi piniartut eqqarsaatigalugit siunissami, taamatut oqaaseqarnerup ajoqusiisinnaanera eqqarsaatigalugu assorujussuaq nunatsinni Piniarnermut Aalisarnermullu Naalakkersuisup oqaaseqarnissaa ulluni kingullerni maqaasivara.

Ane Hansenip naatsorsuutigisimagaluarnerarpaa Piniarnermut Naalakkersuisup Great Greenlandimut tunngatillugu oqallinnermi sassartaarujussuarsimanera eqqarsaatigalugu piaartumik pisumut matumunnga oqaaseqarumaartoq.

- Kisianni tassa taamaattoqanngimmat Naalakkersuisut isummernissaat nukinginnarsivoq. Oqallinnerup taamaattup siammarpallaannginnerani isumaqarpunga pingaaruteqartoq naalakkersuisut Qallunaat nunanni naalakkersuisunut saaffiginninninnissaat; paaseqatigiilluni ajornartorsiutaalersup anigornissaa eqqarsaatigalugu pisariaqarmat.

Naalakkersuisut danskit naalakkersuisuinut saaffiginninnissaat pingaarluinnarpoq, inatsiseqarnermut ministerip taama saqqummiussinera siunissaq ungasinnerusoq eqqarsaatigalugu piniartunut ajoqutaasinnaammat, tamannalu erloqinartuuvoq. Ane Hansen oqarpoq.

- Aammalu anigorniarneqanngippat piffissaq ungasinnerusoq eqqarsaatigalugu annilaangassutigineqarsinnaavoq oqillinnerup nunanut allanut sukkasoorujussuarmik siammaassinnaanera.

Ane Hansen oqarpoq naalakkersuisut oqaaseqarumanngiinnassappata Inatsisartut Piniarnermut Aalisarnermullu Ataatsimiititaliaannit piffissami qanittumi saaffigineqarumaartut.