Ane Hansen: Meeqqat inuusuttullu kommunitsinni pinerluttartut amerlavallaaqaat
Nuna tamakkerlugu inuusuttuaqqat 15-it 17-illu akornani ukiullit siorna 376-riarlutik pinerlupput, siornaammut sanilliullugit 60 procentimik amerlanerullutik. Tamanna politiit ukiumoortumik kisitsisaataanni allaqqavoq. Taakkunanilu 15-inik ukiullit pinerluuteqarnerpaapput.
Kommune Qeqertalik 6300-inik inoqarpoq. Politiit suliaat meeqqat inuusuttuaqqallu pinerlussimanerannut tunngasut Kommune Qeqertalimmi aamma amerliartuinnarmata, tamakku maanna ajornartorsiutaanerpaasut borgmesteri naliliivoq.
2002 - 2017 Inuit Ataqatigiit sinnerlugit Inatsisartut ilaasortaq.
2009 - 2013 Aalisarnermut, Piniarnermut kiisalu Nunaateqarnermut Naalakkersuisoq
1999 - 2003 Namminersorneq pillugu Isumalioqatigiissitaq
1997 - 2001 Borgmesteri, Aasiaat
2008 – 2017 Qaasuitsup Kommunia-ni Kommunalbestyrelsimut ilaasortaq.
2013 – 2017 2. viceborgmester, Qaasuitsup Kommunia
1990 - 1996 Qimarnguiit Katuffianni siulersuisuunernut ilaasortaq
1986 – 1992 Pinaveersaartitsinermi isumalioqatigiissitami ilaasortaq, Paarisa.
Tusarfik: Kommune Qeqertalik
- Meeqqanik inuusuttuaqqanillu sullissineq, aammalu politiit nalunaarusiaat tunngavigalugit amerlavallaarmata, meeqqat inuusuttuaqqallu pinerluttartut ukiukilligalutuinnarlutillu, Ane Hansen KNR-imut oqarpoq.
Kommunillu ajornartorsiut akiornialereeraa, taanna erseqqissaavoq. Meeqqanut inuusuttuaqqanullu sullissisut tamarmik isumasioqatigiissimapput. Tassani meeqqat atuarfianni atuartut angusarissaarnerusalernissaat atuanngitsoornerillu ikilisinniarneqarnissaat ukiuni tallimani tullerni anguniarneqassasoq aalajangerneqarpoq.
Siusinnaartumik ikiorusukkai
Ane Hansenip inuit atugaasa pitsanngorsarnissaat pingaarnerpaatut qineqqusaarutiginiarlugu oqarpoq. Taassuma utoqqaat amerliartuinnarnerat inuusuttullu pinerluttarneruleriartornerat imminnut ataqatigiinngitsutut taavai. Meeqqat inuusuttullu utoqqarnut siunissami sullisseqataasussaammata siusinnaartumik ikiorusuppai.
- Sapinngisamik meeqqat inuusuttuaqqallu pinerluttunngunnginneranni inuunermut pitsaasumut sangutissinnaanissaat angorusuppara, Ane Hansen oqarpoq.
Naatsorsueqqissaartarfiup kisitsisaatai naapertorlugit Kommune Qeqertalimmi inuit 65-leereertut ukiut 20-it matuma siornatigut 500-ngajaapput ukioq mannalu 700-ngajaallutik.
Anguniakkamilu angunissaannut kommune akissaqarnerarpaa. Qaasuitsummi kommunerisimasaa marlunnut avinneqarmat Kommune Qeqertalik allaffissornikkut aaqqissuusseqqinnermini ukiumi siullermi 12 millionit koruuninik ukiunilu tullerni suli amerlanerusunik sipaartoq, borgmesteri oqarpoq.