Ane Hansen: -KNAPK, suna ajornersoq pillugu oqaluttuutsigut

Aalisarnermut Naalakkersuisup Ane Hansenip isumaa naapertorlugu, sinerissap qanittuani aalisarneq annaanniaraanni, aalisarneq pillugu inatsimmi allannguutissat pisariaqarluinnartuupput.

Taamaaliornikkut siunnersuut ukiaru akuerinneqassappat, nunatsinniittut allat aningaasaliisinnaanngussammata.

Tassalu allannguutissat sumik kinguneqarsinnaanerannik aarleqqutiminnik, KNAPK-p nassuiaanissaa Ane Hansenip ujartorpaa.

- Itinerusumik tunngavilersuutai tusarusuppakka, aarlerinerannut suut pissutaanersut paasiniassagatsigu, Ane Hansen oqarpoq.

Aalisarneq pillugu inatsimmi allannguutaajumaartussat aalisartut piniartullu kattuffiata ataannarnissaanut navianartorsiortitsisuusut, siulittaasoq Leif Fontaine ippassaq mianersoqqussivoq.  
Aalisartullu siunissaat pinnagu KNAPK-lli siunissaa siulittaasup isumakuluutigippagu, Ane Hansenip paasiuminartinneruaa.

- KNAPK sinerissap qanittuani raajarnianik amerlanerusunik ilaasortaqarnikuugaluarpoq, kisiannili immaqa alloriarnissamik erinittallutik allamik peqatigiiffiliornikuugaluarlutik, Ane Hansen oqarpoq.

Ane Hansenilli erseqqissarpaa, KNAPK-miit tunuliaquterneqarnissaq, Naalakkersuisunut suli pingaartuusoq, taaamaammallu kattuffiup sinnissaanik Kuupik Kleist peqatigalugu ippassaq ataatsimeeqateqarpoq. Suleqatigiissitanillu pilersitsissallutik tassani isumaqatigiipput. Taakkunannga sinerissamut qanittumi aalisarnermi aalisariutinik nutarsaanermi aningaasaleeriaasissaq oqallisaasoq ukiap tungaanut aammaarlugu misissorneqassaaq.

Atassutip Naalakkersuisut qinnuigisimavai, aalisarneq pillugu inatsimmi allannguutissat siullermeerneqarnissaanik ukiamut kinguartitseqqullugit, aammali ilimasaarereerluni, siunnersuut taamatut isikkoqartillugu akuerinaviarnagu. Partiip siulittaasuata tullia Siverth K Heilmann KNR-imut oqarpoq.

Kisianni allannguutissatut siunnersuutit aallarnisarlugit suliarinissaasa, apriilip arfernani pisussap kinguartinnissaa, Naalakkersuisut kissaatiginngikkaat, Ane Hansen erseqqissaavoq.