Ane Hansen: Kattuffiit isumaat assigiinngippallaarput

Aalisarnermut naalakkersuisoq Ane Hansen oqarpoq, kattuffiit aalisarnermik soqutigisaqartut apeqqutini assigiiingitsunik suli isumaqatigiingissuteqarpallaartut.

Inatsisissatut siunnersuut Inatsisartunut 2011-imi upernaakkut saqqummiunneqassasoq Ane Hansen oqarpoq.

- Kinguartitsinernut inatsimmi allanngueqqaarnissaq eqqarsaatigivallaanngilara, kisianni ukua paasissutissat saqqummiunneqartut tunngavilersorluarnissaannut periarfisseerusunnera tunngaviuneruvoq, Ane Hansen oqarpoq.

Tassalu aalisarneq pillugu inatsisissatut siunnersuut utaqqineqaqisoq aamma kinguarteqqinneqarpoq. Inatsit 2003-mili noqqaassutigineqarpoq.

Ane Hansen oqarpoq partiit kinguartitsinermut paasinnittut, soorluttaaq

aalisartut kattuffii akuersaarnerarai.

Aalisarnermi kattuffiit apeqqutini assigiinngitsuni assigiinngitsumik isummernerat kinguartitsinermut tungaviuvoq, ilaatigut aalisakkanik tunisassiorfinnik ingerlatallit nunamiittut oqarmata, tulaassisussaatitaaneq ataannartariaqartoq, illuani avataasiorlutik aalisartut sinerissallu qanittuani aalisartut ilaasa taanna atorunnaaqquaat.

Aalisarneq pillugu ataatsimiititaliarsuup erseqqissumik inassutigaa, nunamut tulaassuisussaatitaaneq atorunnaassasoq.

Aalisarnerup sinerissap qanittuanut avataanullu avinneqarsimanera atorunnaassasoq aamma inassutaavoq. KNAPK-li isumaqarpoq, avitsisimaneq attatiinnarneqassasoq, allaallu pisassanit tamarmiusunit sinerissap qanittuani aalisartut pisassaat amerleqqullugit.

Tassalu illua tungeriit imminut qaninneruleqqullugit Ane Hansen misissuisitsissaaq.

Assersuutigalugu Aalisartut akornanni aningaasarsiornerup qanoq ingerlaarnera sukumiisumik qulaajarneqassaaq.

Avataasiutinik aalisariutaatillit kinguaariinnit tullernit taarserneqarnissaat aamma ajornartorsiutitaqarpoq. Kilisaatit 500 millioni koruunit missaannik naleqartut, piginittut oqarput, kinguaariinnillu tullernit pisiarineqassappata, 1 milliard koruunit pisariaqarnerarlugit.

Sinerissap qanittuani aalisartut 275 millioni koruunit missaannik akiitsoqarput, taakkunannga Royal Greenlandimit aamma Polar Seafoodimillu 200 millioni koruunit missaat atukkiusasalutilluunniit qularnaveqqusiissutaallutik.

Aningaasatigut taama pituttugaaneq qanoq sunniuteqassanersoq, Ane Hansenip aamma paaseqqaarusuppaa.

- Oqaatigisinnaavara fiskerikommissionip inassuteqaatai arfineq-marluusut tamangajammik malinneqarmata, taamaattorli una sinerissap qanittuani avataasiorlunilu aalisarnernik avissaartitsinissaq attatiinnarneqassalluni, Ane Hansen erseqqissaavoq.