Ane Hansen: Karl Lyberth piumaavikkuni iliuuseqarsinnaavoq

Aalisartut taama eqqorneqartut siusinnerpaamik 2014-mi aaqqivigineqarsinnaasut, Aalisarnermut Naalakkersuisup, Karl Lyberthip, Qanoruumi apersorneqarnermini ippassaani oqaatigaa.
Kisianni aalisarnermut  naalakkersuisoq piumaavikkuni qanoq iliuuseqarsinnaasoq, aalisarnermut naalakkersuisuusimasoq, Ane Hansen, paarlatsiminut maanna oqariartuuteqarpoq.

Aalisartut pingasut assigiinngitsunik peqquteqarlutik qaleralinniarnermut akuersissutaarussimapput, assersuutigalugu aalisartut ataatsip inooqatini Nuummi ilinniarnerani najorsimavaa, tamatumali kingorna Ilulissaniileqqilluni akuersissummik qinnuteqaraluarami itigartitaalluni.

Aalisartut sukaterinermit eqqugaasut aalisaleqqissappata, inatsit aallanngortinneqartariaqartoq, aalisarnermut naalakkersuisoq Qanoruumut ippassaq oqarpoq:

- Tassa oqartariaqarpunga uanga ilisimasakka malillugit allanngortinneqarsinnaasoq taanna inatsit aappaagu upernaakkut, Aalisarnermut naalakkersuisoq Karl Lyberth taama oqarpoq. 

- Aappaatigullu nuannaarutigalugu imatut paasisorigakku Naalakkersuisuusimasut suliaasa nangeqqinnissaat ajorisimannginnamiuk pilersaarutaareersut malillugit taamanikkussamut aatsaat allannguutissamik siunnersuuteqarniartoq, Naalakkersuisut siuliini aalisarnermut naalakkersuisuusimasoq, Inuit Ataqatigiit sinnerlugit Inatsisartuni ilaasortaq Ane Hansen, taama quiassuarpoq.

Kisianni suliaq taama pisariutigisariaqanngimmat, Karl Lyberthip aatsaat 2014-mi aalisartunut aaqqiiniarluni oqariartuuteqarnera Ane Hansenip ippigaa, tassami Karl Lyberth qineqqusaarnermini arlaleriarluni oqariartuuteqartarmat qinigaaguni aqaguani suliassaminik aallartitsiniarluni:

- Piumavikkuni periarfissaqaraluarpoq avannaani qaleralinniarnermik akuersissutinik nutaanik mattussigallarsimaneq atorunnaarsissallugu nalunaarut aqqutigalugu. Taannalu nammineq suliarisinnaavaa, aamma taanna Inatsisartut akuersiteqqaarnissaannik pisariaqartitsinngilaq inatsit tunngaviusoq pioreermat, Ane Hansen oqarpoq.

Taanna aalisartuusimasut qaleralinniarsinnaanermut akuersissummik piniarnissaannut ima kaammattuuteqarpoq:

- Naammagittaalliornikkut anguneqarsinnaasarput tunngavilersuutit paasinaraangata. Soorlu nappaat ilinniagaqarnerluunniit pissutigalugu peqanngikkallarsimaneq peqqutaasimappat immikkut akuerineqarnissaannut aamma periarfissaqaraluarpoq.

Maannalumi Aalisarnermut Naalakkersuisup, Karl Lyberthip, aalisartuusimasut aalisarnermut inatsimmit eqqornerlunneqartut qanoq iliuuseqarfiginialerpai:

- Tassa soorunami taakkua periarfissat assigiinngitsut misissorneqassapput. Periarfissinneqaqqinnissaat siunertaralugu suliniutit assigiinngitsut aallartinneqassapput. Aamma pisariaqarpat nalunaarut allanngortinneqassasoq, taava aamma taanna sulineq soorunami ingerlanneqassaaq, Karl Lyberth oqarpoq, nangillunilu:

- Uani oqaatigissavara umiatsiaararsortut taakkua eqqarsaatigalugit soorunami maalaarfissaq periarfissaavoq, taanna neriuppunga aamma atorluassagaat. Taava uanga Naalakkersuisututut neriorsuutigisinnaavara taakkua maalaartut soorunami tulleriiaarlugit maalaartartut isummertarfianinngaanniit taakkua pimoorullugit tiguneqassasut. Taava takussavarput tassani qanoq pisoqassanersoq.

Aalisartuusimasut akuersissummik tuniumaneqannginneri, Aalisarnermut Naalakkersuisup aaqqiivigisariaqarai, Siumut sinnerlugu Inatsisartunut ilaasortaq, Karl Kristian Kruse, tusagassiuutinut ullumi aamma allagaqarpoq.