Ane Hansen: Kalaalimerngit amerlanerit pisiniarfinnut

Kalaaliminertorluartarnissaq qangaaniilli eqqartorneqartuartarpoq, eqqortumilli oqassagutta inuussutissat Kalaallit Nunaanni pisuussutaasut nerisartakkatta 90 procentiisa missaat avataanit eqqussugaapput.
februaarip 22-at 2008 05:27

Taama allappoq Inuit Ataqatigiit Inatsisartunut ilaasortaatitaat, Ane Hansen. Taanna isumaqarpoq inuussutissanik nunatsinneersunik amerlanerusunik pisiniarfinni nioqquteqartalernissaq Naalakkersuisut anguniartariaqaraat.

-Ukiumik aalajangersimasumik piffissaliisariaqarpugut, soorlu ima oqarsinnaalertariaqarpugut, inuussutissaarniarfinni pisiarineqarsinnaasut 30 procentii Kalaallit Nunaanninngaaneersuussasut, Ane Hansen allappoq.

Kalaalimerngit pillugit Naalakkersuisut 2004-imili isumalluarsaarutaasa massakkut qanoq ingerlanerannik ilisimasat annikipput, Naalakkersuisunillu paasissutissiisarnerit killeqarpallaarlutik, Ane Hansen, piniarneq pillugu Nuummi isumasioqatigiinnermi naammasseqammersumi peqataanermini matumannga isumassarsisoq, allappoq.

Isumasioqatigiinnermi piniartut aalisartullu tunisiniartarnerminni qanoq periarfissalutsigisartut Ane Hansenip paasivaa, savaatillillu savaateqarnerup ineriartortinneqarnissaanik suliniuteqarnerminni ajornartorsiutaat aamma paasillugu. Nioqqutissiornerup politikkikkut tapersersorneqarnissaa Ane Hansenip ujartorpaa, nioqqutissat Kalaallit Nunatsinneersut amerlanerit taamaalillutik ulluinnarni nioqqutaasalernissaat anguneqarsinnaassammat.